Yevropa Ittifoqi Ukrainadagi harbiy jinoyatlar bo‘yicha Rossiyaga qarshi beshinchi sanksiyalar paketini ma’qulladi, deb yozmoqda Deutsche Welle.
Nashrning yozishicha, yangi sanksiyalar Rossiya ko‘mirining importiga to‘liq embargo qo‘yish, shuningdek, Rossiyaga qurol yetkazib berish va Rossiya yog‘ochlarining importini taqiqlashni o‘z ichiga oladi. Bu haqda Fransiyaning Yevropa Ittifoqi kengashidagi vakolatxonasi Twitter’da ham ma’lum qilgan.
Qayd etilishicha, mazkur chora-tadbirlar Rossiyadan qazib olinadigan yoqilg‘ilar importini to‘liq taqiqlamaydi, biroq Yevropa Ittifoqi rasmiylari, agar Moskva keskinlashishda davom etsa, ushbu chora qo‘llanishi mumkinligini aytgan.
Sanksiyalarning yangi to‘plami to‘rtta bank, jumladan “VTB” bank uchun tranzaksiyalarni to‘liq taqiqlashni o‘z ichiga oladi. Rossiya kemalari va Rossiya bayrog‘i ostida suzib yuruvchi kemalarning Yevropa Ittifoqi portlariga kirishi taqiqlanadi.
Sanksiya ro‘yxatida tadbirkorlar, jurnalistlar va harbiylar bor. Ko‘riladigan choralarga Rossiyadan 5,5 milliard yevro miqdorida yog‘och, sement va dengiz mahsulotlarini olib kirishni taqiqlash ham kiritilgan. Chora-tadbirlar to‘plami Yevropa Ittifoqining rasmiy jurnalida e’lon qilinganidan (8-aprelda e’lon qilinishi kutilmoqda) keyin kuchga kiradi.
Yevropa Ittifoqi komissiyasi hisob-kitoblariga ko‘ra, ko‘mirga embargo qo‘yilsa Rossiya yiliga 4 milliard yevro daromad yo‘qotishi mumkin.
Izoh (0)