Покистон Олий суди Миллий Ассамблеянинг тарқатиб юборилишини «конституцияга зид» деб топди, деб ёзмоқда Reuters. Ассамблея бош вазир Имрон Хоннинг мурожаати ортидан президент Ориф Алвий қарори билан тарқатиб юборилганди.
«Бош вазирнинг президентга Миллий ассамблеяни тарқатиб юборишни маслаҳат беришга ҳаққи йўқ эди. Шу пайтгача қабул қилинган барча қарорлар бекор қилинди», — дея Олий суд қароридан иқтибос келтирган нашр.
Олий суд Миллий Ассамблеяга 9 апрель, шанба куни бош вазир Имрон Хонга ишончсизлик вотуми бериш учун йиғилиш чақиришни буюрди.
Эслатиб ўтамиз, 3 апрель куни Ориф Алвий бош вазирнинг таклифига биноан Миллий Ассамблеяни (парламент қуйи палатаси) тарқатиб юборди. Бу мухолифатнинг Хонни мамлакатдаги иқтисодий вазиятни яхшилай олмаётганликда, шунингдек, коррупцияда айблаб, бош вазирга ишончсизлик вотумини эълон қилишга уринишлар бошланганидан кейин юз берди.
Имрон Хон ҳокимиятдан четлатишга уринишлар унинг Хитой ва Россия билан яхши муносабатларини ёқтирмайдиган хорижий давлатлар, хусусан, АҚШнинг аралашуви билан амалга оширилганини айтди. Вашингтон бу айбловларни рад этмоқда.
69 ёшли Имрон Хон, собиқ спортчи ва профессионал крикетчи, 2018 йилнинг августидан бери Покистон бош вазири лавозимида ишлаб келмоқда. 1996 йилда «Теҳрик-и-Инсаф» партиясини тузгач, республикадаги энг машҳур сиёсатчилардан бирига айланди.
Изоҳ (0)