Afg‘oniston milliy qarshilik fronti yetakchisi Ahmad Mas’udning tansoqchisi Kobulda “Tolibon” vakillari tomonidan qo‘lga olindi. Bu haqda uning qarindoshlariga tayanib, Aamaj News agentligi xabar berdi.
Ahmad Mas’udning tansoqchisi bo‘lgan Abdul Majid 29-mart kuni Afg‘oniston poytaxtidagi Panjsad-Familida qo‘lga olingan. “Tolibon” hozircha mazkur holatga hech qanday izoh bermagan.
Ma’lumotlariga ko‘ra, Abdul Majid 2021-yilning sentabr boshlarida Panjsherdagi janglarda ishtirok etgan.
Milliy qarshilik fronti o‘tgan yilning avgustida Kobul va boshqa afg‘on shaharlari “Tolibon” nazorati ostiga o‘tgach, Panjsher viloyatida tuzilgan edi. “Tolibon”ga qarshi turuvchi yangi guruhga Ahmadshoh Mas’udning o‘g‘li, Buyuk Britaniyada ta’lim olgan 32 yoshli Ahmad Mas’ud rahbarlik qila boshlagan.
Eslatib o‘tamiz, 2021-yil 15-avgustda toliblar poytaxt Kobulni egallagan va Afg‘onistonda hukumat tepasiga kelgan. Prezident Ashraf G‘ani mamlakatdan qochib ketgandi.
Biroq Panjsher “Tolibon” nazorati ostiga o‘tmagan yagona viloyat sifatida toliblarga qarshilik ko‘rsatdi, u yerda o‘zini davlat rahbari deb e’lon qilgan vitse-prezident Amrulla Solih ham joylashib oldi. 22-avgust kuni “Tolibon” panjsherliklarga ultimatum e’lon qilib, to‘rt soat ichida taslim bo‘lishni talab qildi. “Milliy qarshilik fronti” yetakchisi Ahmad Mas’ud va Panjsherning boshqa oqsoqollari viloyatni topshirib qo‘ymasligini bildirdi. Keyinroq “Tolibon” hududga yuzlab jangchilarni yuborganini ma’lum qilib, viloyatni qamal qilishni boshladi. “Tolibon” Panjsher aholisini internetdan uzib qo‘ydi, hududda mobil aloqa ishlashdan to‘xtadi. Oxir-oqibat 6-sentabrda “Tolibon” Panjsherni — Afg‘onistondagi toliblar tomonidan nazorat qilinmayotgan so‘nggi viloyatni egalladi.
Ma’lumot uchun, Milliy qarshilik fronti Afg‘onistonning shimoliy va markaziy viloyatlarida toliblarga qarshi partizan urushlarini olib bormoqda. Mas’udning o‘zi xorijga chiqib ketgan. Yanvar oyida u Tehronda “Tolibon” vakillari bilan uchrashgan edi. Biroq muzokaralar hech qanday ahamiyatli natijaga olib kelmagan. Ahmad Mas’udning so‘zlariga ko‘ra, toliblar qarshilik kuchlariga taslim bo‘lishni va Afg‘onistonda yangi hukumat tuzishdan bosh tortishni taklif qilgan.
Izoh (0)