Афғонистон миллий қаршилик фронти етакчиси Аҳмад Масъуднинг тансоқчиси Кобулда «Толибон» вакиллари томонидан қўлга олинди. Бу ҳақда унинг қариндошларига таяниб, Aamaj News агентлиги хабар берди.
Аҳмад Масъуднинг тансоқчиси бўлган Абдул Мажид 29 март куни Афғонистон пойтахтидаги Панжсад-Фамилида қўлга олинган. «Толибон» ҳозирча мазкур ҳолатга ҳеч қандай изоҳ бермаган.
Маълумотларига кўра, Абдул Мажид 2021 йилнинг сентябрь бошларида Панжшердаги жангларда иштирок этган.
Миллий қаршилик фронти ўтган йилнинг августида Кобул ва бошқа афғон шаҳарлари «Толибон» назорати остига ўтгач, Панжшер вилоятида тузилган эди. «Толибон»га қарши турувчи янги гуруҳга Аҳмадшоҳ Масъуднинг ўғли, Буюк Британияда таълим олган 32 ёшли Аҳмад Масъуд раҳбарлик қила бошлаган.
Эслатиб ўтамиз, 2021 йил 15 августда толиблар пойтахт Кобулни эгаллаган ва Афғонистонда ҳукумат тепасига келган. Президент Ашраф Ғани мамлакатдан қочиб кетганди.
Бироқ Панжшер «Толибон» назорати остига ўтмаган ягона вилоят сифатида толибларга қаршилик кўрсатди, у ерда ўзини давлат раҳбари деб эълон қилган вице-президент Амрулла Солиҳ ҳам жойлашиб олди. 22 август куни «Толибон» панжшерликларга ультиматум эълон қилиб, тўрт соат ичида таслим бўлишни талаб қилди. «Миллий қаршилик фронти» етакчиси Аҳмад Масъуд ва Панжшернинг бошқа оқсоқоллари вилоятни топшириб қўймаслигини билдирди. Кейинроқ «Толибон» ҳудудга юзлаб жангчиларни юборганини маълум қилиб, вилоятни қамал қилишни бошлади. «Толибон» Панжшер аҳолисини интернетдан узиб қўйди, ҳудудда мобил алоқа ишлашдан тўхтади. Охир-оқибат 6 сентябрда «Толибон» Панжшерни — Афғонистондаги толиблар томонидан назорат қилинмаётган сўнгги вилоятни эгаллади.
Маълумот учун, Миллий қаршилик фронти Афғонистоннинг шимолий ва марказий вилоятларида толибларга қарши партизан урушларини олиб бормоқда. Масъуднинг ўзи хорижга чиқиб кетган. Январь ойида у Теҳронда «Толибон» вакиллари билан учрашган эди. Бироқ музокаралар ҳеч қандай аҳамиятли натижага олиб келмаган. Аҳмад Масъуднинг сўзларига кўра, толиблар қаршилик кучларига таслим бўлишни ва Афғонистонда янги ҳукумат тузишдан бош тортишни таклиф қилган.
Изоҳ (0)