Buyuk Britaniya uchta kompaniyaning aktivlarini Rossiya Ukrainada boshlagan harbiy operatsiyalarga qarshi navbatdagi sanksiyalar doirasida muzlatib qo‘ydi. Bu haqda Buyuk Britaniya hukumati sanksiyalar ro‘yxatining yangilangan ma’lumotlarida qayd etilgan.
Londondagi Photon Pro va Majory kompaniyalari, shuningdek, markaziy ofisi Edinburgda joylashgan Djeco Group’ga nisbatan cheklovlar o‘rnatilgan. Hujjatga ko‘ra ushbu firmalarning barchasi Rossiyada Ukrainadagi vaziyatni beqarorlashtirish, mamlakatning hududiy yaxlitligi, suvereniteti va mustaqilligiga nisbatan tahdidlar paydo qilishdagi ishtiroki tufayli “qora ro‘yxat”ga kiritilgan.
Photon Pro rahbariyatida rossiyalik Nataliya Degtyar va Yevgeniy Grinin kiradi, Majory’ni esa rossiyalik Aleksey Krugovov hamda Andrey Zaxarov boshqaradi. Djeco Group kompaniyasi aksiyalarining 75 foizlik ulushi maltalik tadbirkor ayol Yevgeniya Bernovaga tegishli.
Avvalroq Britaniyaning rossiyalik biznesmenlar va Donbass respublikalariga qarshi yangi sanksiyalarni joriy qilmoqchiligi, shuningdek, Yaponiya Rossiyaga qarshi yangi sanksiyalar kiritgani haqida xabarlar berilgan. Xitoy tashqi ishlar vaziri Rossiyaga qarshi sanksiyalarni nomaqbul harakat deb atagan.
Buyuk Britaniya Rossiyaga qarshi sanksiyalar ro‘yxatini oxirgi marta 24-mart kuni kengaytirgan. Shu kuni Rossiyadan jami 59 nafar shaxs va tashkilot, shuningdek Belarusdan olti nafar shaxs qora ro‘yxatga kiritilgan. “Sberbank” rahbari German Gref, “Tinkoff” banki asoschisi Oleg Tinkov, shu bilan birga “Gazprombank”, “Alfa-bank”, “Rossiya temir yo‘llari”, “ALROSA” va “RusGidro”ga nisbatan sanksiyalar qo‘llanilgan.
Izoh (0)