Afg‘onistonda urush tugadi, deya ma’lum qildi “Tolibon” harakati rasmiy vakili Muhammad Naim Al-Jazeera telekanali efirida.

“Biz Afg‘onistonning barcha arboblari bilan muloqot olib borishga tayyormiz va ularga zarur himoya taqdim etilishini kafolatlaymiz”, — deya qo‘shib qo‘ydi Naim.

Uning so‘zlariga ko‘ra, “Tolibon” o‘zining har bitta qadamini mas’uliyat bilan bosadi va barcha tomonlar bilan tinch munosabatlarni saqlab qolishni xohlaydi.

“Biz o‘zimiz intilgan narsaga — mamlakat ozodligiga va xalqimiz mustaqilligiga erishdik”, — qo‘shimcha qildi “Tolibon” vakili. Uning so‘zlariga ko‘ra, guruh Afg‘oniston hududidan boshqa mamlakatlarga hujum qilish uchun foydalanilishiga yo‘l qo‘ymaydi va boshqa mamlakatlar ichki ishlariga aralashmaydi. Shuningdek, Naim xalqaro masalalarni muzokaralar orqali hal qilishga tayyorligini bildirdi.

Twitter’da “Tolibon” vakili ishontirishicha, Afg‘oniston poytaxtining guruh nazorati ostiga o‘tishi chet el fuqarolari va diplomatik missiyalari uchun xavf tug‘dirmaydi.

“Kobuldagilarning barchasi bizga ishonishi mumkin, Islom Amirligi (‘Tolibon’ o‘z davlatini shunday ataydi) kuchlariga esa Kobulda va mamlakatning boshqa shaharlarida xavfsizlikni ta’minlash topshirilgan”, — deyiladi xabarda.

Shuningdek, “Tolibon” hokimiyatni Afg‘onistonning amaldagi prezidenti Ashraf G‘anidan qabul qilib olishdan bosh tortgani xabar berilmoqda.

“RIA Novosti” va “Izvestiya” prezident saroyidagi manbalariga tayanib ma’lum qilishicha, nizo tomonlari hokimiyatning “Tolibon”ga boshqa yetakchilar, shu jumladan, mamlakat sobiq prezidenti Hamid Karzay va Afg‘onistonda milliy yarashuv bo‘yicha oliy kengash rahbari Abdulla Abdulla qo‘lidan tinch yo‘l bilan topshirilishi bo‘yicha turli variantlar ko‘rib chiqilmoqda.

Ashraf G‘anining o‘zi mamlakatni 15-avgust kuni tark etdi.

Britaniyaning The Times gazetasi “Tolibon”ning yuqori martabali yetakchilariga tayanib yozishicha, jangarilar mamlakatda mutlaq hokimiyatga da’vogarlik qilmoqda.

“Tolibon” rasmiy vakili Suhayl Shohin Afg‘onistondagi yangi hukumat tarkibiga harakat a’zosi bo‘lmagan afg‘onistonliklar ham kirishini ma’lum qildi.

“Afg‘oniston inklyuziv islom hukumati haqida gapirganimizda bu unda boshqa afg‘onistonliklar ham ishtirok etishini anglatadi”, — dedi u. Shohin aniq ismlarni aytishga hali erta ekani, ammo hukumatga “ancha taniqli arboblar” jalb qilinishini aytdi.

Harakat vakili so‘zlariga ko‘ra, qurollarini tushirib, “Tolibon”ga qo‘shiladigan harbiy xizmatchilar va politsiyachilarning barchasi afv etiladi, ularning hayoti va mol-mulki xavfdan xoli bo‘ladi.

Uning qo‘shimcha qilishicha, ularning ismlari tegishli ro‘yxatga kiritiladi va ulardan zaxira kuchlari sifatida foydalanilib, zaruratga qarab safarbar qilinadi.

AQSh prezidenti Jo Bayden Afg‘onistondan Amerika qo‘shinlari olib chiqib ketilishini e’lon qilganidan keyin “Tolibon” butun mamlakat hududi bo‘ylab hujum boshladi. Amerika qo‘shinlari mamlakatga 2001-yilda kiritlgan edi.

15-avgust kuni jangarilar Afg‘onistonning butun hududini o‘z nazorati ostiga olganini e’lon qildi. Shu kuni “Tolibon” Kobuldagi prezident saroyiga kirdi. Keyinroq hukumat kuchlari tark etgan barcha davlat muassasalarini va davlat televideniyesini egallab oldi. “Tolibon” televideniye orqali chiqish qilib, fuqarolarni xotirjamlik saqlashga chaqirdi.