“Tolibon” harakati Afg‘onistonda jangarilar qo‘liga o‘tmagan so‘nggi viloyat — Panjsherda qarshilik kuchlarini qurshab olishni boshladi. Bu haqda “Tolibon” vakili Zabihulla Mujohid ma’lum qildi, deb yozadi “RBK”.

Foto: AP Photo

“Tolibon” spikeri qayd etishicha, hozircha bu yo‘nalishda janglar bo‘lmagan. “Biz Panjsher uchun tinch yechim topishga umid qilmoqdamiz”, — dedi u.

22-avgust kuni “Tolibon” o‘zini qarshilik kuchlari yetakchisi deb e’lon qilgan Ahmad Mas’udga ultimatum qo‘ygandi. E’lon qilingan videoda “Tolibon” Panjsher viloyatining bir qismini ushlab turgan tarafdorlari qurollarini tashlashi uchun Mas’udga to‘rt soat vaqt berishini aytdi. “Tolibon” bayonotiga ko‘ra, aks holda qarshilik jangchilari “jazolanadi”. Murojaatga “Tolibon”ning Panjsherga qarab ketayotgani aks etgan videotasvirlar ilova qilingan.

Shuningdek, jangarilar viloyatga hujum qilishga tayyorgarlik ko‘rayotganini qayd etdi. Panjsher Afg‘onistonda “Tolibon” hukmronligi o‘rnatilmagan yagona mintaqadir. Vitse-prezident Amrulla Solih va “Tolibon”ga qarshi koalitsiyaning sobiq rahbari Ahmadshoh Mas’udning o‘g‘li Ahmad Mas’ud qarshilik kuchlariga rahbarlik qilmoqda. Afg‘oniston prezidenti Ashraf G‘ani qochib ketganidan so‘ng, Solih o‘zini davlat rahbari deb e’lon qilgan va “Tolibon”ga qurolli qarshilik ko‘rsatishga chaqirgan.

Mas’ud Asharq al-Awsat’ga bergan intervyusida muzokaralar yo‘li orqali “Tolibon” bilan qo‘shma hukumat tuzishga tayyorligini ma’lum qildi. Uning so‘zlariga ko‘ra, mamlakatda ekstremistik hukumat tuzish qabul qilinmaydi, chunki bu Afg‘onistonning o‘zi uchun ham, mintaqa uchun ham tahdidga aylanadi. “Agar ular qurol bilan Panjsherga kirsa, biz so‘nggi odamimizgacha himoya qilishga tayyormiz, ammo tinchlik yaratishga imkon berish kerak, garchi bu tinchlik ‘Tolibon’ bilan bo‘lsa ham” — dedi Mas’ud.

Ultimatumdan ko‘p o‘tmay “Tolibon” Panjsher viloyatiga “yuzlab jangchilarini” yuborganini ma’lum qildi. “Islom amirligidan yuzlab mujohidlar Panjsherga qarab yo‘l olmoqda, mahalliy rasmiylar uni tinch yo‘l bilan topshirishdan bosh tortgani sababli mujohidlar mintaqani o‘z nazoratiga olmoqchi”, — deya “Tolibon” bayonotidan iqtibos keltirdi The Economic Times nashri.