AQSH prezidenti Jo Bayden 31-martda yaqin olti oy davomida har kuni davlat strategik zaxirasidan o‘rtacha 1 million barrel neft bozorga yo‘naltirilishini e’lon qildi. Bu haqda “Interfaks” xabar bergan.
“Bugun keyingi olti oy davomida strategik zaxiradan kuniga 1 million barrel neft ajratilishini ma’qulladim”, – degan Bayden Oq uydagi bayonotida.
AQSH davlat rahbarining so‘zlariga ko‘ra bu mamlakat tarixida strategik zaxiradan ajratiladigan eng katta hajmdagi neft bo‘ladi.
Bayden jurnalistlarning savollariga javob qaytarish vaqtida administratsiyasi tomonidan ko‘rilayotgan chora-tadbirlar neft narxining tushishiga qay darajada ta’sir ko‘rsatishi borasida aniq bir narsa deya olmasligini ta’kidlagan.
“Narxlarning qay darajada pasayishini hech kim bilmaydi”, – degan u.
AQSH prezidenti bu ko‘p jihatdan strategik zaxiradan ajratiladigan neftdan mamlakat ittifoqchilarining foydalanishga rozilik berish yoki bermasligiga bog‘liqligini qo‘shimcha qilgan. Bayden ular bilan birgalikda 30-50 million barrel ajratilishini taxmin qildi.
Avvalroq Oq uy Baydenning ushbu tashabbus bo‘yicha butun dunyodagi ittifoqchilar hamda hamkorlar ishini muvofiqlashtirishi haqida axborot bergan. Bayden mazkur tashabbusga boshqa mamlakatlar ham qo‘shilishi kutilayotgani va agar hammasi rejadagidek ketsa bir kunda 1 million barreldan ko‘proq neft ajratish imkoniyati ham yuzaga kelishini ta’kidlagan.
AQSH administratsiyasi neft sotuvidan tushgan daromad kelgusi yillar uchun strategik neft zaxirasini to‘plashga sarflanishini qayd etgan.
AQSH strategik neft zaxirasidan qisqa davr uchun qarzga neft oladigan va qo‘shimcha hajm bilan qaytaradigan kompaniyalarga (odatda neftni qayta ishlaydigan korxonalar) yonilg‘i almashinuvi doirasida zaxiraning muayyan qismidan ozod qilgandi.
2022-yil mart oyi boshlarida zaxiralardan 63 million barrel neft ajratilgan, Xalqaro energetika agentligi ishtirokchi-mamlakatlarning 1,5 milliard barrel neft zaxirasiga egaligini bildirgan.Avval Zelenskiy Bayden bilan Kiyev va Moskva o‘rtasidagi muzokaralarning borishi haqida fikr almashgani, Oq uy Putin va Bayden qachon uchrashishi mumkinligini ma’lum qilgani, Bayden AQSHning Ukrainaga mudofaa uchun ko‘mak berishda davom etishini qayd etgani haqida xabarlar berilgan.
Izoh (0)