Toshkent shahrida yosh qizlarni fohishalik qilish uchun Turkiyaga sotib yuborayotgan ayol qo‘lga olindi, deb xabar bermoqda Tergov departamenti.
Qayd etilishicha, 23-mart kuni Toshkent shahar Ichki ishlar bosh boshqarmasi xodimlariga S. ismli ayol yosh qizlarni ishonchiga kirib, aldov yo‘li bilan Turkiyaning Istanbul shahriga fohishalik bilan shug‘ullanish uchun yuborayotgani to‘g‘risida ma’lumot kelib tushgan. Kelib tushgan ma’lumot yuzasidan olib borilgan tezkor qidiruv ishlar natijasida S. ismli ayol Toshkent shahar Uchtepa tumanida yashovchi A.S. (27 yoshli) ekani aniqlangan.
U moddiy manfaat evaziga Toshkent viloyati Zangiota tumanida yashovchi I.Sh.ni (26 yoshli) Turkiya davlatida mo‘may daromad topishga qiziqtirib, yo‘l haqi va boshqa xarajatlarni ishlab berish sharti bilan Istanbulga fohishalik bilan shug‘ullanishi uchun yuborayotgan vaqtida ashyoviy dalillar bilan qo‘lga olingan.
Tergov jarayonida ayol Turkiya fuqarosi bo‘lgan F. ismli shaxs bilan birgalikda ushbu jinoyatni sodir etganini ma’lum qilgan. U I.N.ni Turkiya davlatiga yuborish uchun A.S.ga 500 dollar yuborgan, shundan 350 dollariga aviachipta xarid qilgan. Qolgan 150 dollarini esa xizmat haqi evaziga olib qolib, o‘zining ehtiyojlariga sarflab yuborgan.
Holat yuzasidan A.S.ga nisbatan Jinoyat kodeksning 135-moddasi 2-qismi “e” bandi (bir guruh shaxslar tomonidan oldindan til biriktirib sodir etilgan odam savdosi) bilan jinoyat ishi qo‘zg‘atilib, u protsessual tartibda ushlangan. Hozirda tergov harakatlari olib borilmoqda.
Avvalroq BAAda odam savdosida gumonlanib, 9 yildan buyon qidiruvda bo‘lgan o‘zbekistonlik ayol deportatsiya qilingani, Samarqandda ikki qizni Turkiyaga fohishalikka yubormoqchi bo‘lgan shaxs ushlangani to‘g‘risida xabar berilgandi.
Izoh (0)