O‘zbekiston hukumati apreldan Rossiya bilan muntazam temiryo‘l qatnovlarini qayta tiklash niyatida. Bu haqda transport vaziri Ilhom Mahkamovga tayanib, “RIA Novosti” xabar berdi.
“Hozirda rossiyalik hamkasblarimizdan ruxsat kutyapmiz. Prognozlar bor, 1-apreldan barchasi yo‘lga tushadi degan umiddamiz”, — deydi Mahkamov Toshkentda o‘tkazilgan birinchi Xalqaro investitsiya forumida.
Transport vazirligi rahbari 2020-yilning martida koronavirus pandemiyasi sabab Rossiya bilan to‘xtatilgan temiryo‘l transportlarining qayta tiklanishi muhim ahamiyatga ega ekanini ta’kidlagan.
“Faqat aviaqatnovlarga bog‘lanib qolish to‘g‘ri emas. Chunki hozirda bu kabi qatnovlarga muhtoj ko‘plab odamlar bor”, — deya qo‘shimcha qiladi Mahkamov.
Eslatib o‘tamiz, O‘zbekistonda ilk bor koronavirus aniqlangan 2020-yil 16-martdan boshlab temiryo‘l transporti qatnovlari to‘xtatilgan edi. 2020-yilning 15-avgustidan mahalliy avia va temiryo‘l qatnovlari bosqichma-bosqich tiklangan. 2022-yil 1-apreldan boshlab O‘zbekistondan Qozog‘istonga temiryo‘l qatnovlari bosqichma-bosqich qayta tiklanmoqda.
Izoh (0)