O‘zbekiston tovar-xomashyo birjasida shakar narxi ketma-ket uchinchi kun pasaydi

O‘zbekiston tovar-xomashyo birjasida shakarning narxi 23-martdan beri pasayishda davom etmoqda. Bu haqda birja matbuot xizmati xabar berdi.

2022-yil 25-martda o‘tkazilgan ochiq birja savdo natijalariga ko‘ra shakarning barcha kategoriyasi bo‘yicha shakllangan o‘rtacha kunlik narxi avvalgi savdo kuniga nisbatan mahsulotning bir tonnasi uchun 8,73 mln so‘mdan 8,56 mln so‘mgacha, ya’ni 2 foizga pasaygan.

So‘nggi ikki kun davomida birjada shakarni xarid qilish bo‘yicha Toshkent shahri va Toshkent viloyati (33 foiz), Samarqand (15 foiz), Qashqadaryo (12 foiz), Farg‘ona (8 foiz) va Andijon (7 foiz) viloyatlari yetakchilik qildi.

Shakarning birjadagi narxi pasayishiga bozor vositalarining qo‘llanishi, jumladan, birjaning shakar segmentida taklif darajasi oshirilishi hisobiga erishildi.

Xususan, 24-martda birja savdolariga jami 3 200 tonna shakar qo‘yilgan bo‘lib, ulardan 2874 tonnasi, ya’ni 90 foizi sotildi. Bunda, birja savdolari orqali “Xorazm shakar” MCHJ tomonidan 1 600 tonna va “Angren shakar” MCHJ tomonidan 1 274 tonna shakar sotildi.

Avvalroq Ukraina mamlakat hududida shakar eksportini taqiqlagani haqida xabar berilgan edi. Yaqin kunlarda xuddi shunday qaror Rossiya tomonidan ham qabul qilinadi. Bundan keyin birjada shakar narxlari qimmatlashdi.