Kreditlar, bojxona va soliq tushumlari oshdi. O‘zbekistonda yil boshidan beri ishbilarmonlik faoliyati qanday bo‘ldi?

Iqtisodiy tadqiqotlar va islohotlar markazi O‘zbekistonda ishbilarmonlik faoliyatini tahlil qildi. Bu haqda markaz matbuot xizmati ‘‘Daryo’’ga ma’lum qildi.

Monitoring natijalari shuni ko‘rsatdiki, joriy yilning 1-yanvaridan 28-fevraligacha bo‘lgan davrda respublikada soliq tushumlari hajmi o‘tgan yilning shu davriga nisbatan 20,8 foizga oshgan. 

Shu bilan birga Sirdaryo (52 foiz), Buxoro (45,2 foiz), Namangan (40,6 foiz), Farg‘ona (40,4 foiz), Qashqadaryo (39,8 foiz) viloyatlarida va Toshkent shahrida (62 foiz) soliq tushumlarining sezilarli o‘sishi qayd etildi.

Soliq tushumlarining o‘sishi iqtisodiyotdagi ijobiy o‘zgarishlar, jahon oltin bozoridagi narxlar konyunkturasi, soliq ma’muriyatchiligi tizimini takomillashtirish hisobiga ta’minlangani aytilmoqda. Bundan tashqari yangi ma’muriy vositalarni joriy etish, jarayonlarni raqamlashtirish va avtomatlashtirish, tadbirkorlik faoliyatini qonuniylashtirish va soliq qonunchiligi talablariga rioya qilish tartibini soddalashtirish ishlari ham amalga oshirilgan.

Xuddi shu davrda bojxona to‘lovlari bo‘yicha tushumlar 47,1 foizga oshgan.

Bojxona tushumlarining o‘sishi tashqi savdo aylanmasining o‘sishi, mamlakatning ishlab chiqarish quvvatlarini ko‘paytirish, bojxona ma’muriyatchiligi tartib-taomillarini soddalashtirish hisobiga ta’minlangani aytilmoqda.

Davlat bojxona qo‘mitasi ma’lumotlariga ko‘ra, yil boshidan buyon tovarlar eksporti hajmi o‘tgan yilning shu davriga nisbatan 15,4 foizga oshgan. 

O‘zbekiston eksportining o‘sishi sanoat mahsulotlari, oziq-ovqat mahsulotlari, kimyo va qishloq xo‘jaligi mahsulotlari eksportining o‘sish sur’atlari bilan izohlanmoqda.

Joriy yilning 1-yanvaridan 28-fevraligacha bo‘lgan davrda tijorat banklari tomonidan berilgan kreditlar hajmi o‘tgan yilning shu davriga nisbatan 3,8 foizga o‘sdi.

Tahlil qilinayotgan davrda tovar-xomashyo birjasida tuzilgan bitimlar hajmi 46,6 foizga o‘sdi.

Tuzilgan bitimlar hajmining o‘sishi avtomobil benzini, dizel yoqilg‘isi, qora metallar, paxta tolasi, polietilen, ozuqabop bug‘doy, qurilish materiallari, spirtli ichimliklar va boshqalar kabi tovarlar savdosini ko‘paytirish orqali ta’minlanmoqda.