Navoiyda 20 va 22 yoshli qizlarni Dubayga fohishalik uchun yuborayotganlar qo‘lga olindi

Navoiy shahrida ikkita qizni Dubayga fohishalik uchun yuborayotgan shaxslar qo‘lga olindi. Bu haqda viloyat IIB axborot xizmati xabar berdi.

Qayd etilishicha, 13-yanvar kuni Navoiy shahar Abdulla Avloniy ko‘chasida yashovchi X.N. viloyat IIB boshlig‘i nomiga ariza bilan murojaat qilgan. Unga ko‘ra, Konimex tumani “Guliston” MFYda ro‘yxatda turib, ayni paytda Dubay shahrida yashovchi Sh.N. Telegram orqali yosh qizlar bilan aloqa o‘rnatib, aldab, mamlakatdan fohishalik qilish uchun olib ketishni maqsad qilgan.

Xususan, 20 yoshli xatirchilik O.B. hamda 22 yoshli karmanalik X.N.ning barcha xarajatlari qoplanishi hamda aviachipta pullari to‘lab berilishi va’da qilingan.

Qizlar Sh.N.ning sherigi G.Sh. orqali Dubayga olib chiqib ketilayotgan vaqtda viloyat IIB terrorizm va ekstremizmga qarshi kurashish boshqarmasi hamda DXX xodimlari tomonidan to‘xtatib qolingan.