Тошкент шаҳрида ёш қизларни фоҳишалик қилиш учун Туркияга сотиб юбораётган аёл қўлга олинди, деб хабар бермоқда Тергов департаменти.
Қайд этилишича, 23 март куни Тошкент шаҳар Ички ишлар бош бошқармаси ходимларига С. исмли аёл ёш қизларни ишончига кириб, алдов йўли билан Туркиянинг Истанбул шаҳрига фоҳишалик билан шуғулланиш учун юбораётгани тўғрисида маълумот келиб тушган. Келиб тушган маълумот юзасидан олиб борилган тезкор қидирув ишлар натижасида С. исмли аёл Тошкент шаҳар Учтепа туманида яшовчи А.С. (27 ёшли) экани аниқланган.
У моддий манфаат эвазига Тошкент вилояти Зангиота туманида яшовчи И.Ш.ни (26 ёшли) Туркия давлатида мўмай даромад топишга қизиқтириб, йўл ҳақи ва бошқа харажатларни ишлаб бериш шарти билан Истанбулга фоҳишалик билан шуғулланиши учун юбораётган вақтида ашёвий далиллар билан қўлга олинган.
Тергов жараёнида аёл Туркия фуқароси бўлган Ф. исмли шахс билан биргаликда ушбу жиноятни содир этганини маълум қилган. У И.Н.ни Туркия давлатига юбориш учун А.С.га 500 доллар юборган, шундан 350 долларига авиачипта харид қилган. Қолган 150 долларини эса хизмат ҳақи эвазига олиб қолиб, ўзининг эҳтиёжларига сарфлаб юборган.
Ҳолат юзасидан А.С.га нисбатан Жиноят кодекснинг 135-моддаси 2-қисми «э» банди (бир гуруҳ шахслар томонидан олдиндан тил бириктириб содир этилган одам савдоси) билан жиноят иши қўзғатилиб, у процессуал тартибда ушланган. Ҳозирда тергов ҳаракатлари олиб борилмоқда.
Аввалроқ БААда одам савдосида гумонланиб, 9 йилдан буён қидирувда бўлган ўзбекистонлик аёл депортация қилингани, Самарқандда икки қизни Туркияга фоҳишаликка юбормоқчи бўлган шахс ушлангани тўғрисида хабар берилганди.
Изоҳ (0)