O‘zbekistonda elektromobilda taksi qiladigan shaxslar 2040-yilgacha barcha litsenziya to‘lovlari va yig‘imlardan ozod etiladi

Iqtisodiy taraqqiyot va kambag‘allikni qisqartirish vazirligi “Elektromobillar ishlab chiqarish va ulardan foydalanishni tashkil etishni qo‘llab-quvvatlash choralari to‘g‘risida”gi prezident qarori loyihasini muhokamaga qo‘ydi. Unda elektromobilda taksistlik qiladigan fuqarolarga bir qator yengilliklar berilishi ko‘zda tutilgan.

Qayd etilishicha, qaror bilan elektromobillarda taksi xizmatlarini ko‘rsatuvchi jismoniy va yuridik shaxslar 2040-yilga qadar barcha litsenziya to‘lovlari va yig‘imlaridan ozod qilish taklif etilmoqda. Iqtisodiy taraqqiyot va kambag‘allikni qisqartirish vazirligi, Transport vazirligi, Moliya vazirligi va “O‘zavtosanoat”ga uch oy muddatda respublika hududida bosqichma-bosqich yo‘nalishli va yo‘nalishsiz taksilarni elektromobillarga o‘tkazishni rag‘batlantirishning qo‘shimcha chora-tadbirlar dasturini Vazirlar Mahkamasiga kiritish vazifasi yuklatiladi.

Bundan tashqari, elektromobillarda harakatlanuvchi shaxslar munitsipal (kommunal) mulkka tegishli bo‘lgan avtoturargohlardan foydalanganlik uchun to‘lovlarni to‘lashdan ozod etiladi. Bu borada Qoraqalpog‘iston Vazirlar Kengashi, viloyatlar va Toshkent shahar hokimliklari tegishli choralarni ko‘radi.

Hududiy ma’muriyatlar Energetika vazirligi bilan birga quyidagi miqdorda to‘xtab turish o‘rniga ega bo‘lgan munitsipal (kommunal) mulkka tegishli bo‘lgan avtoturargohlarda kamida 2 dona (2 ta kanalli) tezkor usulda quvvatlantirish stansiyasi infratuzilmasini tashkil etadi:

• 2022-yilda har 200 ta to‘xtash joyiga kamida 2 dona;
• 2023-yilda har 150 ta to‘xtash joyiga kamida 2 dona;
• 2024-yilda har 100 ta to‘xtash joyiga kamida 2 dona;
• 2025-yilda har 60 ta to‘xtash joyiga kamida 2 dona;
• 2026-yilda har 40 ta to‘xtash joyiga kamida 2 dona.

Umumiy foydalanishda bo‘lgan yer uchastkalarida quvvatlantirish stansiyalarini hamda ularning har biri atrofida kamida ikkita elektromobil uchun to‘xtash joyini belgilash sxemasini stansiyalarning barcha injenerlik kommunikatsiya tarmoqlariga qulay joylarda o‘rnatilishini tasdiqlaydi. Bunday yer uchastkasi qismida doimiy foydalanish huquqi asosida tadbirkorlik subyektlariga quvvatlantirish stansiyalarini o‘rnatishga ruxsat beriladi.

Shahar hududida quvvatlantirish tarmog‘ini rivojlantirish maqsadida odamlar bir soatdan ko‘p bo‘lmaydigan jamoat joylarida (yirik savdo markazlari, shahar ichidagi AYQSHlar) Mode 4 tipidagi EQSni o‘rnatish zarur. Ushbu kam vaqt davomida elektromobil egasiga elektromobil batareyasini to‘liq zaryad qilishga imkon beradi. Shuningdek, ushbu turdagi EQS bilan temiryo‘l vokzallari va aeroportlar yonidagi taksi to‘xtash joylarida elektromobillarni quvvatlantirish xizmatini yo‘lga qo‘yish mumkin bo‘ladi.

Avvalroq shu qaror loyihasi bo‘yicha davlat idoralarining xizmat avtomobillari bosqichma-bosqich elektromobillarga almashtirilishi haqida xabar berilgandi. Hujjatga muvofiq vazirliklar, idoralar, budjet tashkilotlari, mahalliy hokimiyat organlari hamda ustav kapitalida davlat ulushi 50 foizdan ortiq bo‘lgan korxonalar xizmat avtomobillari parkining 2025-yilga qadar kamida 10 foizigacha, 2030-yilga qadar 100 foizi bosqichma-bosqich elektromobillarga almashtiriladi.