Farg‘ona viloyatida atmosfera havosiga yetkazilayotgan zarar sabab 2 ta korxona faoliyati vaqtincha to‘xtatildi, deb xabar bermoqda Ekologiya va atrof-muhitni muhofaza qilish davlat qo‘mitasi.
Ma’lum qilinishicha, qo‘mita viloyatning O‘zbekiston tumani Sho‘rsuv shaharchasida joylashgan korxonalarning tabiatni muhofaza qilish qonunchiligiga rioya etilishi ustidan o‘rganish olib bordi.
Ixtisoslashtirilgan tahliliy nazorat markazining mobil laboratoriyasi jalb qilinib, hududdagi atmosfera havosidan namunalar olinib, tahlil ishlari amalga oshirildi. Unga ko‘ra, ammiak moddasi 4 ta nuqtada 1,5 dan 23,6 martagacha hamda vodorod sulfidi moddasi 2 ta nuqtada 3,2 dan 4,6 martagacha belgilangan me’yorlardan ortiqligi aniqlandi.
O‘rganish yakunida sement ishlab chiqaruvchi “Moderna sement indasturiyes” MChJ QK hamda gips ishlab chiqaruvchi “Sement xomashyo savdo” MChJda mavjud chang-gaz tozalash uskunalari nosozligi tufayli ish faoliyati vaqtincha to‘xtatildi.
Qayd etilishicha, hozirda me’yordan ortiq chiqqan moddalarni ajratib chiqaruvchi korxonalarni aniqlash, ularda ushbu moddalarni kamaytirish choralarini ko‘rish ishlari olib borilmoqda.
Ekologiya va atrof-muhitni muhofaza qilish davlat qo‘mitasi boshqarma boshlig‘i o‘rinbosari Odilbek Kamilbekov so‘zlariga ko‘ra, respublikada atmosfera havosini ifloslantiruvchi mingdan ortiq yirik korxonalar bor. Mavjud korxona va tashkilotlarda yiliga salkam 6,5 million tonna tashlanmalar hosil bo‘ladi. Uning 5,6 million tonnasi chang-tozalash uskunalariga yo‘naltiriladi. Shundan 5,5 million tonnasi ushlab qolinadi va zararsizlantiriladi. Ulardan 4,6 million tonnasi utilizatsiya qilinadi.
Izoh (0)