Ўзбекистонда электромобилда такси қиладиган шахслар 2040 йилгача барча лицензия тўловлари ва йиғимлардан озод этилади

Иқтисодий тараққиёт ва камбағалликни қисқартириш вазирлиги «Электромобильлар ишлаб чиқариш ва улардан фойдаланишни ташкил этишни қўллаб-қувватлаш чоралари тўғрисида»ги президент қарори лойиҳасини муҳокамага қўйди. Унда электромобилда таксистлик қиладиган фуқароларга бир қатор енгилликлар берилиши кўзда тутилган.

Қайд этилишича, қарор билан электромобилларда такси хизматларини кўрсатувчи жисмоний ва юридик шахслар 2040 йилга қадар барча лицензия тўловлари ва йиғимларидан озод қилиш таклиф этилмоқда. Иқтисодий тараққиёт ва камбағалликни қисқартириш вазирлиги, Транспорт вазирлиги, Молия вазирлиги ва «Ўзавтосаноат»га уч ой муддатда республика ҳудудида босқичма-босқич йўналишли ва йўналишсиз таксиларни электромобилларга ўтказишни рағбатлантиришнинг қўшимча чора-тадбирлар дастурини Вазирлар Маҳкамасига киритиш вазифаси юклатилади.

Бундан ташқари, электромобилларда ҳаракатланувчи шахслар муниципал (коммунал) мулкка тегишли бўлган автотураргоҳлардан фойдаланганлик учун тўловларни тўлашдан озод этилади. Бу борада Қорақалпоғистон Вазирлар Кенгаши, вилоятлар ва Тошкент шаҳар ҳокимликлари тегишли чораларни кўради.

Ҳудудий маъмуриятлар Энергетика вазирлиги билан бирга қуйидаги миқдорда тўхтаб туриш ўрнига эга бўлган муниципал (коммунал) мулкка тегишли бўлган автотураргоҳларда камида 2 дона (2 та каналли) тезкор усулда қувватлантириш станцияси инфратузилмасини ташкил этади:

• 2022 йилда ҳар 200 та тўхташ жойига камида 2 дона;
• 2023 йилда ҳар 150 та тўхташ жойига камида 2 дона;
• 2024 йилда ҳар 100 та тўхташ жойига камида 2 дона;
• 2025 йилда ҳар 60 та тўхташ жойига камида 2 дона;
• 2026 йилда ҳар 40 та тўхташ жойига камида 2 дона.

Умумий фойдаланишда бўлган ер участкаларида қувватлантириш станцияларини ҳамда уларнинг ҳар бири атрофида камида иккита электромобиль учун тўхташ жойини белгилаш схемасини станцияларнинг барча инженерлик коммуникация тармоқларига қулай жойларда ўрнатилишини тасдиқлайди. Бундай ер участкаси қисмида доимий фойдаланиш ҳуқуқи асосида тадбиркорлик субъектларига қувватлантириш станцияларини ўрнатишга рухсат берилади.

Шаҳар ҳудудида қувватлантириш тармоғини ривожлантириш мақсадида одамлар бир соатдан кўп бўлмайдиган жамоат жойларида (йирик савдо марказлари, шаҳар ичидаги АЁҚШлар) Моdе 4 типидаги EQSни ўрнатиш зарур. Ушбу кам вақт давомида электромобиль эгасига электромобиль батареясини тўлиқ заряд қилишга имкон беради. Шунингдек, ушбу турдаги EQS билан темир йўл вокзаллари ва аэропортлар ёнидаги такси тўхташ жойларида электромобилларни қувватлантириш хизматини йўлга қўйиш мумкин бўлади.

Аввалроқ шу қарор лойиҳаси бўйича давлат идораларининг хизмат автомобиллари босқичма-босқич электромобилларга алмаштирилиши ҳақида хабар берилганди. Ҳужжатга мувофиқ вазирликлар, идоралар, бюджет ташкилотлари, маҳаллий ҳокимият органлари ҳамда устав капиталида давлат улуши 50 фоиздан ортиқ бўлган корхоналар хизмат автомобиллари паркининг 2025 йилга қадар камида 10 фоизигача, 2030 йилга қадар 100 фоизи босқичма-босқич электромобилларга алмаштирилади.