Afg‘onistonda hokimiyat tepasiga kelgan “Tolibon” harakati davlat muassasalariga mamlakatning oldingi hukumati tomonidan foydalanilgan qora-qizil-yashil rangli bayroqlarni ilishni taqiqladi. Bu boradagi tegishli qaror harakat yetakchisi Haybatulla Oxunzoda tomonidan qabul qilingan, deb xabar beradi toliblar Mudofaa vazirligi vakili Lutfulla Xabibi.
Endilikda davlat muassasalarida “Tolibon” hokimiyat tepasiga kelganidan so‘ng, davlat ramzi deya e’lon qilgan bayroqdan foydalanishga ruxsat berilgan.
Ta’kidlanishicha, bu kabi qaror 17-mart kuni Fozil-Muhammad Saber “Tolibon”ning Turkmanistondagi elchisi etib tayinlangan marosimda ag‘darilgan hukumatning uch rangli bayrog‘idan foydalanilganidan so‘ng qabul qilingan.
Avvalroq “Tolibon” Afg‘onistonning oldingi hukumati tomonidan Xitoy va Pokistonda tayinlangan diplomatlarini almashtirgan edi. Ammo u yerdagi rasmiy marosimda afg‘on bayroqlaridan hech biridan foydalanilmagan.
Eslatib o‘tamiz, 2021-yilning avgustida “Tolibon” hokimiyat tepasiga kelgach, Kobul va boshqa yirik shaharlarda uch xil rangli bayroqni davlat ramzi sifatida saqlab qolish uchun aksiyalar bo‘lib o‘tgandi. Ularning ayrimlari jangarilar tomonidan quroldan foydalangan holda tarqatib yuborilgan.
Izoh (0)