Ukraina prezidenti Vladimir Zelenskiy Ukraina xavfsizlik kafolatlarini olganidan so‘ng, Rossiya bilan Qrim masalasini muhokama qilishga va Donbass respublikalarini tan olishga tayyorligini ma’lum qildi.
“Bu barchamiz uchun og‘ir tarix. Qrim ham, Donbass ham — barcha uchun. Bu borada biror yechimni topish uchun men aytgan birinchi qadamni tashlash kerak: xavfsizlik kafolatlari, urushning to‘xtatilishi”, — deydi u Yevropa va Ukrainadagi qator telekompaniyalarga bergan intevyusida.
Zelenskiyning so‘zlariga ko‘ra, u ushbu masalalarni Rossiya prezidenti Vladimir Putin bilan uchrashuvda muhokama qilishga tayyor. “Rossiya prezidenti bilan birinchi uchrashuvdayoq ushbu masalalarni ko‘tarishga tayyorman, ular biz uchun muhim… Ammo ishonchim komilki, yechim mazkur uchrashuvda qabul qilinmaydi. Chunki ochiq aytadigan bo‘lsam, xavfsizlik kafolatlari masalasida biz konstitutsion o‘zgarishlar qilish, Ukraina qonunchiligini o‘zgartirish haqida gapiramiz. Demak, bu haqida gapiradigan bo‘lsa, uni nafaqat prezident va Rada, balki Ukraina xalqi hal qiladi”, — deydi u.
20-mart kuni CNN telekanaliga bergan intervyusida Zelenskiy Kiyev Ukraina o‘z suvereniteti va hududiy yaxlitligini yo‘qotmaydigan modelni topishi kerakligini ma’lum qilgandi. Shu bilan birga, 21-mart kuni kechasi Chexiya televideniyesiga bergan intervyusida Zelenskiy “murosaga kelish — bu nimaning evaziga kelayotgan narsa ekanini bilishingiz kerak, biz esa yerimizning bir qarichidan ham voz kecha olmaymiz. Biz Donbass va Qrimni qaytarib olish uchun barcha ishni qilishimiz kerak”.
Avvalroq Rossiya prezidentining yordamchisi Vladimir Medinskiy Kiyev muzokaralarda Ukrainada “neytral demilitarizatsiya qilingan davlatning Avstriya yoki Shvetsiya varianti”ni yaratishni taklif qilayotganini bildirgan. Rossiya prezidentining matbuot kotibi Dmitriy Peskov jurnalistlarga Ukrainada bu kabi neytral davlat varianti muhokama qilinayotgani, u murosaga kelish yo‘li sifatida ko‘rib chiqilishi mumkinligini ma’lum qilgan.
Izoh (0)