Афғонистонда ҳокимият тепасига келган «Толибон» ҳаракати давлат муассасаларига мамлакатнинг олдинги ҳукумати томонидан фойдаланилган қора-қизил-яшил рангли байроқларни илишни тақиқлади. Бу борадаги тегишли қарор ҳаракат етакчиси Ҳайбатулла Охунзода томонидан қабул қилинган, деб хабар беради толиблар Мудофаа вазирлиги вакили Лутфулла Хабиби.
Эндиликда давлат муассасаларида «Толибон» ҳокимият тепасига келганидан сўнг, давлат рамзи дея эълон қилган байроқдан фойдаланишга рухсат берилган.
Таъкидланишича, бу каби қарор 17 март куни Фозил-Муҳаммад Сабер «Толибон»нинг Туркманистондаги элчиси этиб тайинланган маросимда ағдарилган ҳукуматнинг уч рангли байроғидан фойдаланилганидан сўнг қабул қилинган.
Аввалроқ «Толибон» Афғонистоннинг олдинги ҳукумати томонидан Хитой ва Покистонда тайинланган дипломатларини алмаштирган эди. Аммо у ердаги расмий маросимда афғон байроқларидан ҳеч биридан фойдаланилмаган.
Эслатиб ўтамиз, 2021 йилнинг августида «Толибон» ҳокимият тепасига келгач, Кобул ва бошқа йирик шаҳарларда уч хил рангли байроқни давлат рамзи сифатида сақлаб қолиш учун акциялар бўлиб ўтганди. Уларнинг айримлари жангарилар томонидан қуролдан фойдаланган ҳолда тарқатиб юборилган.
Изоҳ (0)