Namanganda viloyat hududidagi yuqori, o‘rta va past bosimli gaz quvurlari to‘liq xatlovdan o‘tkazildi. Bu haqda “Hududgaz Namangan” gaz ta’minoti filiali direktorining birinchi o‘rinbosari O‘tkirbek Mamadaliyev ma’lum qildi deya xabar beradi “Daryo” muxbiri Azizbek Abduvaliyev.
Buning uchun hokimlik, Milliy gvardiya, IIB, qurilish, gaz ta’minoti va boshqa soha mutasaddilaridan iborat 13 ta ishchi guruh tashkil etildi.
“Ishchi guruhlar tomonidan viloyatdagi gaz quvurlarining muhofaza zonalarida 210 ta turar joy obyekti, 54 ta noturar joy obyekti mavjudligi aniqlandi. Tabiiy gaz bilan bog‘liq favqulodda vaziyatlar va yong‘inlarning oldini olish maqsadida ularning egalari bilan profilaktik suhbatlar o‘tkazildi. Noqonuniy qurilmalarni qisqa muddatlarda bartaraf etishlari zarurligi yuzasidan ogohlantirish xatlari berildi. Ularni demontaj qilish ishlari allaqachon boshlab ham yuborilgan”, — deydi O‘tkirbek Mamadaliyev.
“Hududgaz Namangan” gaz ta’minoti filiali mutasaddilari tomonidan o‘tkazilgan brifingda qayd etilishicha, viloyatda 2021—2022-yil kuz-qish mavsumida nostandart, qo‘lbola gaz jihozlari hamda isitish moslamalaridan foydalanish oqibatida 9 marotaba gaz va havo aralashmasi portlashi sodir bo‘lgan. Ushbu hodisalar oqibatida bir kishi halok bo‘lgan, 24 nafar odam tan jarohati olgan.
“Bunday ayanchli holatlarga yo‘l qo‘ymaslik maqsadida ishchi guruhlar tomonidan aholi xonadonlaridagi gaz jihozlari ham to‘liq xatlovdan o‘tkazilmoqda. Xatlov natijalariga ko‘ra aniqlangan ma’nan eskirgan, nostandart va qo‘lbola gaz jihozlari o‘rnatilgan xonadonlarga tabiiy gaz yetkazib berilishi butunlay to‘xtatiladi”, — deya ta’kidladi O‘tkirbek Mamadaliyev.
Izoh (0)