Наманганда вилоят ҳудудидаги юқори, ўрта ва паст босимли газ қувурлари тўлиқ хатловдан ўтказилди. Бу ҳақда «Ҳудудгаз Наманган» газ таъминоти филиали директорининг биринчи ўринбосари Ўткирбек Мамадалиев маълум қилди дея хабар беради «Дарё» мухбири Азизбек Абдувалиев.
Бунинг учун ҳокимлик, Миллий гвардия, ИИБ, қурилиш, газ таъминоти ва бошқа соҳа мутасаддиларидан иборат 13 та ишчи гуруҳ ташкил этилди.
«Ишчи гуруҳлар томонидан вилоятдаги газ қувурларининг муҳофаза зоналарида 210 та турар жой объекти, 54 та нотурар жой объекти мавжудлиги аниқланди. Табиий газ билан боғлиқ фавқулодда вазиятлар ва ёнғинларнинг олдини олиш мақсадида уларнинг эгалари билан профилактик суҳбатлар ўтказилди. Ноқонуний қурилмаларни қисқа муддатларда бартараф этишлари зарурлиги юзасидан огоҳлантириш хатлари берилди. Уларни демонтаж қилиш ишлари аллақачон бошлаб ҳам юборилган», — дейди Ўткирбек Мамадалиев.
«Ҳудудгаз Наманган» газ таъминоти филиали мутасаддилари томонидан ўтказилган брифингда қайд этилишича, вилоятда 2021—2022 йил куз-қиш мавсумида ностандарт, қўлбола газ жиҳозлари ҳамда иситиш мосламаларидан фойдаланиш оқибатида 9 маротаба газ ва ҳаво аралашмаси портлаши содир бўлган. Ушбу ҳодисалар оқибатида бир киши ҳалок бўлган, 24 нафар одам тан жароҳати олган.
«Бундай аянчли ҳолатларга йўл қўймаслик мақсадида ишчи гуруҳлар томонидан аҳоли хонадонларидаги газ жиҳозлари ҳам тўлиқ хатловдан ўтказилмоқда. Хатлов натижаларига кўра аниқланган маънан эскирган, ностандарт ва қўлбола газ жиҳозлари ўрнатилган хонадонларга табиий газ етказиб берилиши бутунлай тўхтатилади», — дея таъкидлади Ўткирбек Мамадалиев.
Изоҳ (0)