“Real” hujumchisi Karim Benzema “Malyorka”ga qarshi bahsda (3:0) dubl qayd etdi.
Karim faoliyatidagi gollari sonini 413 taga yetkazdi va futbol tarixidagi eng yaxshi fransiyalik to‘purarga aylandi. Benzema bu borada Tyerri Anrini (411 ta gol) ortda qoldirdi.
Benzema madridliklar safida ketma-ket 5 o‘yindan buyon gol urib kelmoqda. Fransuz so‘nggi bor 15-fevral kuni Chempionlar Ligasi 1/8 finali “PSJ”ga qarshi o‘yinda (0:1) maydonni golsiz tark etgan edi. Shundan buyon 34 yoshli Karim 5 ta o‘yinda 8 ta gol va 4 ta golli uzatmani o‘z hisobiga yozdirib qo‘ydi.
Hujumchi “Real” safida 2021/22-yilgi mavsum barcha musobaqalarda 32 ta gol urdi. Shu tariqa fransiyalik futbolchi bir mavsumda urilgan gollar bo‘yicha Madrid klubidagi eng yaxshi natijasini takrorladi. 2011/12-yilgi mavsumda Benzema 32 ta gol urgandi.
Karim Benzema 2009-yilda “Lion”dan “Real Madrid” safiga o‘tgan edi. Madridliklar futbolchi uchun 35 million yevro to‘lagan. 34 yoshli futbolchi 2021/22-yilgi mavsum La Ligada 24 ta o‘yinda 20 ta gol urishga muvaffaq bo‘ldi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)