“Real”ning uch futbolchisi “Barselona”ga qarshi o‘yin oldidan jarohat oldi.
Karim Benzema Ispaniya chempionatining 28-turidan o‘rin olgan “Malyorka”ga (3:0) qarshi bahsda dubl qayd etdi. Lekin 34 yoshli hujumchi ikkinchi golni urayotgan paytda chap oyog‘ining boldir mushagi shikastlandi.
Shundan so‘ng Karim biroz muddat o‘ynashga harakat qildi, ammo 85-daqiqada maydonga o‘tirdi va o‘yinni davom ettirolmasligini bildirdi.
Undan tashqari uchrashuvda hujumchi Rodrigo Goes va himoyachi Ferlan Mendi ham jarohat oldi. 21 yoshli braziliyalik shifokorlar hamrohligida maydonni tark etishga majbur bo‘ldi. Fransiyalik himoyachining mushaklarida muammo yuz bergan.
“Qaymoqranglilar” bosh murabbiyi Karlo Anchelotti futbolchilarning jarohati jiddiy emasligi, ammo tibbiy ko‘rik natijalarini kutish lozimligini ta’kidlagan. Jurnalist Mario Kortegana esa Benzema, Mendi va Rodrigo klasikoda maydonga tushishga tayyorligini aytib o‘tgan.
“Real” 20-mart kuni La Liganing 29-turida “Barselona”ga qarshi bahs yuritadi.
Madridliklar Ispaniya chempionatining ortda qolgan 28 turidan so‘ng 66 ochko jamg‘argan holda 1-o‘rinni band etib turibdi va eng yaqin ta’qibchisi “Sevilya”ni 10 ochkoga ortda qoldirmoqda.
Izoh (0)