Buyuk Britaniya 18-mart mahalliy vaqt bilan tongi soat 4:00 dan boshlab barcha koronavirus cheklovlarini bekor qiladi. Bu haqda Buyuk Britaniya transport vaziri Grant Shepps ma’lum qilgan.
18-martdan boshlab Buyuk Britaniyaga kelganlarning majburiy tartibda koronavirusga test topshirishi bekor qilinadi. Bundan tashqari, shu kundan e’tiboran sayyohlar Passenger Locator Form anketasini to‘ldirishga majbur emas.
Vazirning so‘zlariga ko‘ra, mazkur ijobiy o‘zgarishlarga mamlakatda koronavirusga qarshi vaksinalardan samarali va keng foydalanilgani tufayli erishilgan.
Yanvar oxirida Angliyada ko‘plab koronavirus cheklovlari, xususan, jamoat joylarida majburiy tibbiy niqob taqish tartibi bekor qilingan. Shuningdek, mamlakatda tungi klublar, konsertlar va boshqa ommaviy tadbirlarda ishtirok etish uchun kovid-pasportlardan ham voz kechilgan. Shuningdek, Buyuk Britaniya bosh vaziri Boris Jonson Angliyada ko‘plab koronavirus cheklovlari, xususan, tibbiy niqob taqib yurish bekor bo‘lishini e’lon qilgandi.
Izoh (0)