So‘nggi kunlarda bug‘doy, makkajo‘xori va soya narxi jahon global moliyaviy inqirozga yuz tutgan 2008-yil darajasidan oshib ketdi. Bu haqda ekspertlarga tayanib, The Guardian yozmoqda.
Narxlarning oshishi Ukrainadagi voqealardan oldin ham iqlim o‘zgarishi va koronavirus pandemiyasi fonida kuzatilgan.
Biroq eng yirik bug‘doy eksportchilaridan biri — Ukrainada endi ekin mavsumi xavf ostida. Agar G‘arb sanksiyalariga javoban Moskva bug‘doy eksportini qisqartirsa, Rossiyadan mahsulotni yetkazib berish ham xavf ostida qolishi mumkin.
Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) ma’lumotlariga ko‘ra, Ukraina bug‘doy eksporti bo‘yicha beshinchi o‘rinni egallab, jahon bozorida uning ulushi qariyb 10 foizni tashkil etadi. Shuningdek, u eng yirik makkajo‘xori eksportchilaridan biri hisoblanadi — jahon eksportidagi ulushi 15 foiz atrofida.
Rossiya ham jahon bozorida qariyb 17 foiz ulushi bilan bug‘doy eksporti bo‘yicha dunyoda yetakchilardan hisoblanadi, kungaboqar urug‘i yetkazib berish bo‘yicha esa ikkinchi o‘rinda turadi.