Буюк Британия ҳукумати мамлакат ҳудудига киришдаги коронавирус чекловлари бекор бўлганини эълон қилди

Буюк Британия 18 март маҳаллий вақт билан тонги соат 4:00 дан бошлаб барча коронавирус чекловларини бекор қилади. Бу ҳақда Буюк Британия транспорт вазири Грант Шеппс маълум қилган.

18 мартдан бошлаб Буюк Британияга келганларнинг мажбурий тартибда коронавирусга тест топшириши бекор қилинади. Бундан ташқари, шу кундан эътиборан сайёҳлар Passenger Locator Form анкетасини тўлдиришга мажбур эмас.

Вазирнинг сўзларига кўра, мазкур ижобий ўзгаришларга мамлакатда коронавирусга қарши вакциналардан самарали ва кенг фойдаланилгани туфайли эришилган.

Январь охирида Англияда кўплаб коронавирус чекловлари, хусусан, жамоат жойларида мажбурий тиббий ниқоб тақиш тартиби бекор қилинган. Шунингдек, мамлакатда тунги клублар, концертлар ва бошқа оммавий тадбирларда иштирок этиш учун ковид-паспортлардан ҳам воз кечилган. Шунингдек, Буюк Британия бош вазири Борис Жонсон Англияда кўплаб коронавирус чекловлари, хусусан, тиббий ниқоб тақиб юриш бекор бўлишини эълон қилганди.