Qozog‘istonda yanvar oyida bo‘lib o‘tgan ommaviy tartibsizliklar chog‘ida jami 230 kishi halok bo‘lgan. Bu haqda mamlakat bosh prokuror Berik Asilov yalpi majlisda ma’lum qildi, deb yozmoqda Tengrinews.

“Halok bo‘lganlar ro‘yxatini rasman e’lon qilganimiz yo‘q. Birinchi navbatda kim jinoyatchi, kim tinch namoyish ishtirokchisi bo‘lganini o‘rganish kerak. Tergov jarayonida bularning barchasini aniqlashimiz zarur, keyin ma’lumot beramiz”, — dedi bosh prokuror.

Qozog‘iston bosh vazirning birinchi o‘rinbosari Roman Sklyar tartibsizliklarda davlat binolariga yetkazilgan zararning umumiy miqdorini ham oshkor qildi. Uning aytishicha, umumiy zarar 30 milliard tengeni (639,6 million dollar) tashkil qilgan.

“Yanvar voqealari chog‘ida mamlakatning sakkiz viloyatida 42 ta davlat binosi zarar ko‘rgan. Bular Olmaota, Chimkent, Olmaota viloyati, Jambil, Qizilo‘rda, Atirau, Aqto‘be va Sharqiy Qozog‘iston viloyatlari shaharlaridagi binolar. Zararning umumiy miqdori 30 milliard tengega yaqinni tashkil etgan. Jumladan, respublika hisobidan 28 milliard tenge budjetdan 18 ta obyektni qayta tiklash uchun ajratildi”, — dedi bosh vazirning birinchi o‘rinbosari.

Qozog‘iston ichki ishlar vaziri Marat Axmetjanov yanvardagi tartibsizliklardan keyin qotillik bo‘yicha 90 ta jinoiy ish tergov qilinayotganini aytdi.

Axmetjanovning so‘zlariga ko‘ra, yanvar voqealaridan buyon politsiya 2919 ta jinoiy ish olib bormoqda.

“Asosan, bular qotillik bo‘yicha — 90, o‘g‘irlik bo‘yicha — 2183, qurol-yarog‘ning noqonuniy muomalasi bo‘yicha — 428, o‘zgalar mulkiga qasddan zarar yetkazish bo‘yicha — 164 ta. Ayni paytda mingdan ortiq shaxs jinoiy javobgarlikka tortilmoqda”, — dedi Axmetjanov majlisda.

Mamlakat bosh prokuraturasi namoyishlar sabab, shuningdek, 19 nafar xorij fuqarosiga nisbatan jinoyat ishi qo‘zg‘atilgani, ulardan 11 nafari o‘zbekistonlik ekani haqida xabar bergandi.