Ukraina prezidenti Vladimir Zelenskiy 16-mart kuni AQSh Kongressining yig‘ilishida onlayn formatda ishtirok etadi. Bu haqda AQSh qonunchilik palatasi vakillariga Senatdagi ko‘pchilik yetakchisi Chak Shumer va Vakillar palatasi spikeri Nensi Pelosining maktubiga asoslanib, Reuters xabar qilgan.
Ukraina prezidentining virtual chiqishi 16-mart Toshkent vaqti bilan 19:00 dan amalga oshadi. Pelosi va Shumer maktubda Ukrainaga hamdardlik bildirib, AQSh Kongressi mamlakatga ijtimoiy yordam berishga intilishi, shuningdek, xavfsizlik hamda iqtisodiyot borasida ham ko‘mak ko‘rsatishga tayyorligini qayd etgan.
Shuningdek, CNN telekanali Vladimir Zelenskiyning 11-mart kuni AQSh prezidenti Jo Bayden bilan suhbatda undan Rossiyaga nisbatan yangi sanksiyalar qo‘llashni so‘ragani haqida xabar bergan. Qayd etilishicha, suhbat chog‘ida Ukraina prezidenti Baydendan Rossiya uchun xalqaro dengiz yo‘llarini yopishni so‘ragan.
14-martda Zelenskiyning Yevropa Kengashi parlamenti assambleyasining sessiyasida videokonferensaloqa tizimi orqali nutq so‘zlashi rejalashtirilgan edi, ammo noma’lum sabablarga ko‘ra u mazkur anjumanda ishtirok etmagan.
Avval Zelenskiy urush vaqtida 1300 nafar ukrainalik harbiylarning halok bo‘lganini ma’lum qilgani, gumanitar falokat jumlasi Rossiya Federatsiyasi bilan sinonim bo‘lib qolgani haqida gapirgani, Ukrainadagi Rossiya mulkini kompensatsiyasiz musodara qilish to‘g‘risidagi va barcha ukrainaliklarga quroldan foydalanishga ruxsat beruvchi qonunlarni imzolagani xabar qilingan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)