Ўзбекистонда энди исталган автомобиль тарихига оид маълумотларни олиш мумкин бўлади

Ҳукумат қарори билан «Автомобиль тарихи» маълумотларини тақдим этиш бўйича давлат хизматини кўрсатишнинг маъмурий регламенти тасдиқланди. Бу ҳақда Telegram’даги «Ҳуқуқий ахборот» канали хабар қилди.

Қарорга кўра, 2022 йил 1 майдан «Автомобиль тарихи» маълумотларини шартномавий асосда ДХМ, ЙИДХП (my.gov.uz) ёки веб-сайтлар ва уларнинг иловалари орқали аниқлаш бўйича давлат хизмати йўлга қўйилади. Автотранспортни техник кўрикдан ўтказиш жараёнида автотранспортнинг босиб ўтган масофаси ҳақидаги маълумотлар, жумладан, техник кўрикдан ўтказувчи тадбиркорлар томонидан ҳам мажбурий тартибда ахборот тизимига киритилади.

«Автомобиль тарихи» маълумотлари қуйидагиларни ўз ичига олади:

• автотранспортнинг агрегат маълумотлари;
• босиб ўтган масофаси;
• шартнома тузилганига оид маълумотлар (ишончнома, ижара, ҳадя);
• йўл-транспорт ҳодисаси содир этилгани;
• қоидабузарликлар ҳолати;
• гаровга қўйилганлик ҳолати;
• тақиқ борлиги ёки йўқлиги;
• божхона расмийлаштирувига оид маълумот;
• лицензия олинганлик ҳолати (йўловчи ташиш учун).

Маълумотнома ахборот хусусиятига эга ҳужжат ҳисобланади. Ариза берувчилар Ўзбекистонда рўйхатдан ўтган исталган автомобиль ҳақида маълумот олиши мумкин.

Аввалроқ Норматив-ҳуқуқий ҳужжатлар лойиҳалари муҳокамаси порталида Давлат хизматлари агентлиги томонидан ишлаб чиқилган «Автомобиль тарихи» маълумотларини тақдим этиш бўйича давлат хизматини кўрсатишнинг маъмурий регламентини тасдиқлаш тўғрисида»ги ҳукумат қарори лойиҳаси эълон қилинганди. Берилаётган маълумотлар ахборот характерига эга бўлиб, келгусида расмий ҳаракатларни амалга ошириш учун асос бўлмайди. Шахсга доир маълумотларнинг кафолатланишини таъминлаш мақсадида маълумотларда мулк эгаси ҳақидаги шахсий маълумотлар, шунингдек, тезкор-қидирув, мудофаа ва хавфсизликка оид автотранспорт воситаларига оид маълумотлар акс эттирилмайди.