Buxoro shahrida Xitoyda ishlab chiqarilgan elektrobuslar harakatlanishni boshladi, deb xabar beradi Buxoro viloyati Transport boshqarmasi matbuot xizmati.
Ma’lumot qilinishicha, deyarli shovqinsiz harakatlanadigan mazkur transportning zamonaviy tashqi va ichki dizayni odatiy avtobuslardan farq qiladi. 27 o‘rindiqli elektrobusning yo‘lovchilarni tashish umumiy hajmi 80 kishidan iborat. Poli past, zinapoyalar va podiumning yo‘qligi tufayli yo‘lovchilar (shu jumladan, pensionerlar, aravachalarda harakatlanuvchi yo‘lovchilar, alohida ehtiyojli kishilar) salon bo‘yicha erkin harakatlana oladi.
Imkoniyati cheklanganlar uchun ajratilgan maxsus o‘rindiqlar esa alohida rang va belgilar bilan ajratilgan. Nogironlar chiqishi uchun zarur ko‘targichlar ham bor. Ichki salon videokuzatuv kamerasi, avtomatik havo namligini saqlash va isitish tizimi bilan jihozlangan.
Viloyat transport boshqarmasi mas’ul xodimi Umid Bahronovning so‘zlariga ko‘ra, ushbu elektrobuslar 2,5 soat davomida oladigan to‘liq quvvati bilan 300-350 kilometr masofani bosib o‘tadi. Ya’ni olingan quvvat ertalabdan kechgacha yetadi.
“Zaryad 12 foiz qolganida avtobus avtomatik tarzda yurishdan to‘xtaydi — shu orqali quvvatlantirish zarurligini bildiradi. Uning aniq ko‘rsatkichlari va boshqa barcha ma’lumotlar esa sensorli ekranda ko‘rinib turadi. Asosiysi, elektrobuslar harakatlanish davomida ekologiyaga mutlaqo zarar yetkazmaydi”, — deydi u.
Xitoyning Zhongtong Bus Co. Ltd kompaniyasida ishlab chiqarilgan ushbu elektrobus Buxoro shahri ko‘chalarida bir necha kun davomida tajribada sinab ko‘riladi. Tashuvchi va yo‘lovchilarning fikrlarini inobatga olgan holda har kunlik monitoring ishlari olib boriladi. Tajribadan kelib chiqib, undan 2022-yil oxiriga qadar 100 ta olib kelinib, yo‘nalishlarga joylashtiriladi.
Avvalroq Toshkentga Xitoyning Yutong Bus Co. Ltd kompaniyasida ishlab chiqarilgan ekologik toza, har tomonlama qulay va zamonaviy bo‘lgan ZK6126BEVG rusumli 20 ta elektrobus keltirilgan edi. Shuningdek, elektrobuslarni quvvatlantiruvchi 10 ta uskuna ham xarid qilingandi.
Izoh (0)