Shavkat Mirziyoyev Yangi Namangan shaharchasining ikkinchi bosqich loyihasi bilan tanishdi

Shavkat Mirziyoyev 9-mart kuni Yangi Namangan shaharchasining bosh rejasini ko‘rib chiqdi. Bu haqda Prezident matbuot xizmati xabar qildi.

Qayd etilishicha, Namangan shahri ham iqtisodiyot, ham nufus jihatidan o‘sgan. So‘nggi besh yilda shahar aholisi 152 ming nafarga ko‘paygan. Shu davrda 300 dan ziyod ko‘p qavatli uylar qurilib, qariyb 65 ming fuqaro yangi xonadonga ega bo‘lgan.

Jumladan, Yangi Namangan shaharchasi loyihasining birinchi bosqichida 330 gektar maydonda 8 ming 500 xonadonli 184 ta uy-joy qurilgan. Shuningdek, 145 gektar maydonda kichik sanoat zonalari tashkil etilib, 10 ming yangi ish o‘rinlari yaratilgan.

Bugungi kunda Namangan shahrida 30 ming fuqaroning uy-joyga ehtiyojli hisoblanadi. Kelgusi yillarda shahar aholisi yiliga 25 ming nafarga ko‘payishi kutilmoqda.

Shu bois Shavkat Mirziyoyev saylovoldi dasturida Namangan shahrini “bir millionlik shahar”ga aylantirish va “Yangi Namangan” shaharchasini kengaytirishni aytgandi. Taqdimotda ushbu shaharchaning ikkinchi bosqichi bosh rejasi ko‘rib chiqilgan.

Unga ko‘ra, 272 gektar maydonda 20 ming xonadonga ega 171 ta ko‘p qavatli uy qurilishi rejalashtirilgan. Davlat rahbari uylarning sifati, infratuzilmasi qanday bo‘lishi bilan qiziqqan. Mutasaddilarga hozir ko‘p qavatli uylarda yashayotgan odamlar va talabgorlar bilan uchrashib, ularning takliflarini olish, shu asosida loyihani tanqidiy qayta ko‘rib chiqib, batafsil rejalashtirish bo‘yicha topshiriq bergan.

Hududda uylarni va muhandislik-kommunikatsiya tarmoqlarini to‘g‘ri joylashtirish, binolarda milliy hunarmandchiligimizga xos bezaklardan foydalanish muhimligi ta’kidlangan. Shaharcha hududida ish o‘rinlari tashkil etish, xizmat ko‘rsatishni rivojlantirish bo‘yicha ko‘rsatmalar berilgan. Loyihaga ko‘ra, bu yerda Yangi O‘zbekiston bog‘ini barpo etish ham rejalashtirilgan.

Prezident bog‘ uchun daraxt ko‘chatlarini hozirdan yetishtirish, ko‘p qavatli uylar oldida va yo‘l bo‘ylarida ham daraxtlar ekish zarurligini ta’kidlagan. Namangan viloyatida kichik sanoat zonalari infratuzilmasini yaxshilash, ichki yo‘llar va ichimlik suvi tarmoqlarini ta’mirlash masalalariga ham e’tibor qaratilgan. Mutasaddilarga hokim yordamchisi, yoshlar yetakchisi va xotin-qizlar faoli ishini tashkil etish, mahallalarda sport maydonchalari, maishiy xizmat majmualari qurish bo‘yicha topshiriqlar berilgan.

Eslatib o‘tamiz, Shavkat Mirziyoyev 2021-yil 27-sentabrda Yangi Namangan shaharchasi loyihasi bilan tanishgandi. Mazkur loyiha uchun Davlatobod tumanining “Yuksalish” hamda To‘raqo‘rg‘on tumanining “Yettikon” mahallalari hududidan 1 ming 371 gektar yer ajratilgan. U yerda 410 ta ko‘p qavatli uy, 7 ta maktab, 4 ta bolalar bog‘chasi, shuningdek, ko‘plab infratuzilma inshootlari barpo etilishi rejalashtirilgan.