Energetika vazirligi O‘zbekistonda aholi bilan o‘zaro hisob-kitob tizimini avtomatlashtirish, “aqlli” gaz hisoblagichlarni o‘rnatish ishlari bo‘yicha erishilgan natijalar bilan o‘rtoqlashdi.
Qayd etilishicha, respublika aholi xonadonlariga 3 million 546 ming 148 dona “aqlli” gaz hisoblagich o‘rnatilishi rejalashtirilgan. 8-mart holatiga ko‘ra 2 million 681 ming 88 ta (78 foiz) hisoblagich o‘rnatilgan. Xususan:
- Qoraqalpog‘istonda— 155 029 dona (64 foiz);
- Andijon viloyatida — 205 985 dona (93 foiz);
- Buxoro viloyatida — 210 539 dona (80 foiz);
- Jizzax viloyatida — 138 526 dona (96 foiz);
- Qashqadaryo viloyatida — 127 994 dona (85 foiz);
- Navoiy viloyatida — 109 510 dona (82 foiz);
- Namangan viloyatida — 174 537 dona (106 foiz);
- Samarqand viloyatida — 177 722 dona (63 foiz);
- Surxondaryo viloyatida — 92 080 dona (85 foiz);
- Sirdaryo viloyatida — 110 326 dona (104 foiz);
- Toshkent viloyatida — 546 617 dona (92 foiz);
- Farg‘ona viloyatida — 218 455 dona (73 foiz);
- Xorazm viloyatida — 161 587 dona (72 foiz);
- Toshkent shahrida — 192 181 dona (31 foiz) zamonaviy tabiiy gaz hisoblagich o‘rnatib bo‘lingan.
Eslatib o‘tamiz, 2021-yil mart oyida “aqlli” gaz hisoblagichlarini o‘rnatish 2021-yil oxirigacha yakunlanishi haqida xabar berilgan edi. So‘ngra shaharda 629 427 nafar chakana gaz iste’molchilari borligi, shundan 448 073 tasi ko‘p qavatli uylarda, 181 354 tasi xususiy uylarda ekani haqida aniqlik kiritilgan. Hisoblagichlarni o‘rnatish aholi uchun bepul. Tashkilot besh yillik kafolatli xizmatni kafolatlaydi.
Prezidentning 2020-yil sentabrdagi qarori bilan 2021-yil 1-avgustga qadar O‘zbekistonning barcha hududlarida zamonaviy hisoblagichlar o‘rnatgan holda gazni monitoring qilish va hisobga olishning avtomatlashtirilgan tizimini joriy etishni yakunlash topshirilgan edi.
“Gazeta.uz”ning yozishicha, Toshkent shahar hokimligi tomonidan tashkil etilgan texnoparkda 2020-yil boshidan buyon Osten savdo belgisi ostida “aqlli” gaz hisoblagichlar ishlab chiqarilmoqda. Loyiha 2021-yil iyuligacha 5,28 trillion so‘mlik 3,54 million dona elektron gaz hisoblagichlarini yetkazib berishni ko‘zda tutadi.
“Intellektual mulk” axborot-qidiruv tizimi ma’lumotlariga ko‘ra, Artel Engineering, Management va J-United Group kompaniyalari (yagona ta’sischi Toshkent shahar hokimi bo‘lgan Jahongir Ortiqxo‘jayev) Osten tovar belgisini ro‘yxatdan o‘tkazish uchun ariza topshirgan.
Toshkent shahridagi ko‘p qavatli va xususiy uylarga “aqlli” gaz hisoblagichlarini o‘rnatish 2022-yil 31-yanvarga qadar yakunlanishi rejalashtirilgan.
Izoh (0)