9-mart kuni soat 11:45 da Qashqadaryo viloyati Dehqonobod tumani “Otkamar” MFYda noqulay ob-havo sharoiti natijasida 3 nafar fuqaroni yashin urdi, deb xabar beradi FVV matbuot xizmati.
Ma’lum qilinishicha, voqea oqibatida bir nafar fuqaro vafot etgan, ikki nafar fuqaroning biriga tibbiy yordam ko‘rsatilib, ambulator davolanishga ruxsat berilgan. Ikkinchi fuqaroga tuman tibbiyot birlashmasida malakali tibbiy yordam ko‘rsatilmoqda.
“O‘z navbatida, fuqarolarimizdan noqulay ob-havo sharoitida xavfsizlik choralariga amal qilishni so‘rab qolamiz”, — deyiladi xabarda.
Avvalroq “O‘zgidromet” Erondan va Kaspiy dengizi hududlaridan bir qator nam havo massalari kirib kelishi hisobiga ish haftasining oxirigacha respublika hududlari bo‘yicha beqaror ob-havo saqlanib turishini ma’lum qilgandi. Shuningdek, “O‘zgidromet” Toshkentda yaqin 2 soat ichida kuchli momaqaldiroq kuzatilib, shamol tezligi kuchayishidan ogohlantirgan.
Izoh (0)