Qonunchilik palatasi deputatlari yo‘l harakatini tashkil etish to‘g‘risidagi qonun loyihasini ko‘rib chiqmoqda

Yo‘l harakatini tashkil etish bilan bog‘liq munosabatlarni tartibga solishga qaratilgan “Yo‘l harakatini tashkil etish to‘g‘risida”gi yangi qonun loyihasi ishlab chiqildi. Bu haqda Oliy Majlis Qonunchilik palatasi deputati Rasul Kusherbayev ma’lum qildi.

Unda yo‘l harakatini tashkil etishning asosiy prinsiplari etib quyidagilar belgilanmoqda:

• fuqarolar manfaatlarining ustuvorligi;
• yo‘l harakatini tashkil etish bo‘yicha faoliyat va tadbirlarning tizimliligi;
• ekologiya va atrof muhitni muhofaza qilishning ustuvorligi;
• piyoda va velosiped harakatlanishi uchun sharoit yaratish;
• ochiq va jamoatchilikni o‘z vaqtida xabardor etish.

Kusherbayevning yozishicha, ushbu qonun asosida “Yo‘l harakati xavfsizligi to‘g‘risida”gi qonunga ham o‘zgartirish va qo‘shimchalar kiritish, jumladan, quyidagilarni belgilash nazarda tutilgan:

• haydovchilik huquqini olishga to‘sqinlik qiluvchi kasalliklar ro‘yxati;
• haydovchilik huquqini olgandan keyin transport vositasini boshqarishga to‘sqinlik qiluvchi kasalliklar ro‘yxati.

“Ko‘rib turganimizdek, bundan buyon avtomobil haydashning o‘zi bo‘lmaydi. Mas’uliyat bir emas, o‘n baravar oshadi. Albatta, mas’uliyat oshishi haydovchilar bilan bir qatorda nazorat qiluvchi organlarning xodimlarida ham parallel ravishda kechmog‘i lozim. Shu bois, o‘rtoqlar avtomobil haydashda ‘o‘pkani bosib’, xushyorlikni oshirishni hozirdanoq boshlayveraylik”, — deya qo‘shimcha qiladi deputat.

Avvalroq O‘zbekistonda haydovchilar tomonidan sodir etiladigan yo‘ldagi bezorilik holatlari uchun ma’muriy javobgarlik joriy etilishi, Toshkentdagi barcha chorrahaga maxsus avtomatlashtirilgan foto va videokameralar o‘rnatilishi to‘g‘risida xabar berilgandi.