Ijtimoiy tarmoqda endi maktablar oldida tezlikni oshirgan haydovchilar jarimaga tortilishi haqida xabarlar tarqaldi. Yo‘l harakati xavfsizligi bosh boshqarmasi matbuot kotibi Azizxon Murodov “Daryo”ga holat bo‘yicha ma’lumot berdi.
Qayd etilishicha, Toshkent shahri bo‘ylab bolalar bilan bog‘liq yo‘l-transport hodisalarining oldini olish maqsadida bir qator profilaktik tadbirlar doimiy o‘tkazilmoqda. Davlat rahbari 11-fevral kuni respublikada yo‘l-transport hodisalarining oldini olish borasida zaruriy chora-tadbirlarni belgilash bo‘yicha o‘tkazilgan videoselektor yig‘ilishida maktab va bog‘chalar atrofida transport vositalarining tezligi 30 kilometr/soatdan oshmasligi shartligini ta’kidlab, ushbu tartibni joriy etish, qoidalarga tegishli o‘zgartirishlar kiritish bo‘yicha topshiriqlar bergan.
Ushbu muassasalar atrofida bolalar xavfsizligini ta’minlash maqsadida radar moslamalaridan foydalangan holda, Toshkent shahar YHXB xodimlari tomonidan targ‘ibot tadbirlari yo‘lga qo‘yilgan.
Hozirda yo‘l harakati qoidalariga o‘zgartirishlar kiritish borasida mas’ul idora va tashkilotlar hamkorligida ishchi guruhlar tuzilib, huquqiy asoslarga tayangan holda o‘rganishlar olib borilmoqda. Maktab va maktabgacha ta’lim muassasalari atrofidagi cheklangan tezlik ko‘rsatkichi yo‘l harakati qoidalarida rasman belgilangandan so‘ng, ushbu tartibni buzgan haydovchilarga nisbatan Ma’muriy javobgarlik to‘g‘risidagi kodeks asosida chora ko‘riladi.
Hozirda faqatgina targ‘ibot va tushuntirish tadbirlari olib borilmoqda.
Izoh (0)