Toshkentda xotin-qizlarni o‘qitish uchun davlat-xususiy sherikchilik asosida to‘qimachilik sohasida alohida universitet tashkil etiladi. Bu haqda Shavkat Mirziyoyev 1-mart kuni o‘tkazilgan videoselektor yig‘ilishida aytib o‘tdi.
Davlat rahbarining so‘zlariga ko‘ra, joylarda paxta-to‘qimachilik, pillachilik va junchilik klasterlari ishtirokida universitetning har bir viloyatda texnikumlari ochiladi.
“Mana kecha Yangihayotga yangi korxonaga bordik. Rahbaridan seni eng qiynayotgan narsa nima, desam kadr qiynayapti, dedi. Eng zo‘r texnologiya turibdi. Kim ishlayapti desam, Turkiyadagi vakillik, dedi. Necha pul oylik olyapti, dedim, bir oyga 5-10 ming beryapman, dedi. Shuni hozir o‘zimiz pul berib o‘qitib olaylik mutaxassislarni”, — degan prezident.
Yig‘ilishda, shuningdek, tadbirkor ayollar ulushini hozirgi 25 foizdan 40 foizga yetkazish bo‘yicha “Biznes ayollar” dasturi qabul qilinishi ma’lum qilingan. Dastur ijrosiga jami 8 trillion so‘m mablag‘ yo‘naltiriladi.
Bundan tashqari, 2022—2026-yillarga mo‘ljallangan Xotin-qizlar ta’limini qo‘llab-quvvatlash dasturi qabul qilinadi. Ayni paytda ayollar ulushi past bo‘lgan aniq fanlar, texnika va huquqshunoslik yo‘nalishidagi OTMlarda xotin-qiz talabalar ulushi hozirgi 24 foizdan 40 foizgacha yetkaziladi. Buning uchun har yili xotin-qizlarning talaba bo‘lishiga kvotaning kamida 50 foizi aniq fanlar, texnika va huquqshunoslik yo‘nalishlari uchun maqsadli ajratiladi.
2022/2023-o‘quv yilidan boshlab oliygoh, texnikum va kollejlarda o‘qiyotgan qizlarga ta’lim kontraktlarini to‘lash uchun ilk marotaba, 7 yil muddatga foizsiz kredit berish joriy qilinadi.
Yangi o‘quv yilidan magistraturada o‘qiyotgan qizlarning kontrakti budjetdan to‘liq qoplab beriladi.
Izoh (0)