Tashqi ishlar vazirligi Ukrainadagi vaziyat tufayli O‘zbekiston elchixonasini boshqa shaharga ko‘chirish masalasi rejalashtirilmayotganini ma’lum qildi.
Qayd etilishicha, fuqarolardan “Kiyevda elchixonalari bo‘lgan ko‘plab davlatlar o‘z idoralarini Lvov shahriga ko‘chirdi. O‘zbekiston ham shunday yo‘l tutishni rejalashtirganmi?”, qabilida savol kelib tushgan. Bunga Tashqi ishlar vazirligi rasmiy vakili quyidagicha javob bergan:
Ayni paytda bizning asosiy ustuvor vazifamiz Ukrainadagi mavjud og‘ir vaziyatni inobatga olgan holda barcha O‘zbekiston fuqarolarini xavfsiz evakuatsiya qilishni ta’minlashdir. Elchixonaning boshqa hududga ko‘chirilishi bu jarayonlar samaradorligini sezilarli darajada pasaytiradi. Shu nuqtayi nazardan hozirda elchixonamizni Kiyevdan ko‘chirish masalasi ko‘rib chiqilmayapti.Eslatib o‘tamiz, O‘zbekistonning Ukrainadagi elchisi Alisher Kurmanov 28-fevral kuni “Daryo” internet-nashriga Ukrainadagi vaziyat va o‘zbekistonliklarni evakuatsiya qilish borasida katta intervyu bergandi. Unda elchi fuqarolarning evakuatsiyasi yakunlangach, kun tartibida elchixona xodimlarini ham evakuatsiya qilish masalasi bor yoki yo‘qligi haqidagi savolga ham javob bergan:
“Ayni damda buni reja qilmaganmiz. Vazifalarimiz bor shuning uchun bunday rejalarimiz yo‘q, albatta. Bu elchixona uchun muhim masala emas. Biz kabi qardosh davlat elchixonalari ham o‘z faoliyatini davom ettiryapti. Elchixonalar bilan vaziyat bo‘yicha fikr almashyapmiz. Ko‘p davlatlar o‘z talabalarini va fuqarolarini olib ketolmayapti.
Lvov eng g‘arbiy shahar. Ba’zi davlat elchixonalari eng xavfsiz joy deb u yerga ko‘chib o‘tdi. Lekin baribir u yerda ham sirenalar chalinyapti. Afsuski, Ukrainaning g‘arbiga yaqin shaharlarda ham janglar bo‘lyapti”.
Izoh (0)