Ijtimoiy tarmoqlarda 2-mart kuni Toshkent viloyati Chinoz tuman prokuraturasi hamda Majburiy ijro byurosining Chinoz tuman bo‘limi xodimlariga noroziligini bildirib, o‘zi va farzandlariga benzin yoqilg‘isini sepib, yoqmoqchi bo‘lgan ayol videosi tarqaldi. MIB axborot xizmati holat yuzasidan “Daryo”ga ma’lumot berdi.
Qayd etilishicha, mazkur holat bo‘yicha o‘rganish ishlari olib borilgan. Aniqlanishicha, videolavhada o‘zini farzandlari oldida yoqmoqchi bo‘lgan fuqaro G.X. bilan bog‘liq 2 ta ijro ishi MIBning Chinoz tuman bo‘limi ish yurituvida bo‘lgan. Jumladan, ijro ishi bo‘yicha sudning 2021-yil 25-avgustdagi ijro varaqasiga asosan, fuqaro G.X. Chinoz tumani “Kattatepalik” mahallasi Fayzli ko‘chasidagi uylarining biriga yashash va foydalanish huquqi bilan kiritib qo‘yilib, tegishli tartibda dalolatnoma rasmiylashtirilgan va ijro hujjati tamomlangan.
Bundan tashqari, fuqarolik ishlari bo‘yicha Quyichirchiq tumanlararo sudining 2019-yil 13-avgust kunidagi ijro varaqasiga asosan, qarzdor S.X.dan undiruvchi G.X. foydasiga aliment undirish to‘g‘risidagi ijro hujjati bo‘lim ish yurituviga kelib tushgan. Ariza kelib tushgan kunning o‘zida “Sud hujjatlari va boshqa organ hujjatlarini ijro etish to‘g‘risida”gi qonunning 23-moddasiga asosan ijro ishi yuritishni qo‘zg‘atish to‘g‘risida qaror chiqarilib, taraflarga yuborilgan. Shuningdek, qarzdorning nomidagi mol-mulklarini aniqlash maqsadida tegishli tashkilot va organlariga “MIB Portal” elektron dasturi orqali so‘rovnomalar yuborilib, olingan javob xatlariga asosan, qarzdorga tegishli mol-mulklar mavjud emasligi aniqlangan.
Ijro harakatlari davomida S.X.ga nisbatan O‘zbekiston Respublikasidan chiqish huquqlari vaqtincha cheklangan. Olib borilgan ijro harakatlari davomida qarzdor Chinoz tumanidagi “Ravnaq Fayz Agro” FXda ishlayotgani aniqlanib, mazkur ijro hujjati oylik ish haqiga yuborilgan. S.X.ning oylik haqidan 2021-yil 1-iyul kuniga qadar undiruvchining plastik hisob raqamiga o‘tkazib kelingan.
Qarzdor S.X.dan undiruvchi G.X.ga tilxat asosida 2021-yil iyul oyidan 2022-yil 1-fevral oyiga qadar 550 ming so‘mdan naqd pul aliment pullarini to‘lagan bo‘lsa-da, hozirda qarzdorligi 7 million 991 ming so‘mni tashkil etgan. Shu bois qarzdorlikni to‘liq bartaraf etish chorasini ko‘rmagani uchun S.X.ga nisbatan to‘plangan hujjatlar ma’muriy javobgarlik masalasi ko‘rib chiqish uchun Jinoyat ishlari bo‘yicha Chinoz tumani sudiga onlayn tarzda yuborilgan.
Videodagi voqealar 25-fevral kuni soat 20:00 larda Chinoz tuman prokuraturasi binosida fuqaro G.X. aliment to‘lovidan norozi bo‘lib kelgan vaqtida sodir bo‘lgan. U o‘ziga benzin yoqilg‘isini sepib yoqmoqchi bo‘lgan vaqtida tuman prokuraturasi hamda Milliy gvardiya qo‘riqlash xizmati xodimlari tomonidan to‘xtatib qolingan.
Hozirda G.X.ning sog‘lig‘i yaxshi va sobiq turmush o‘rtog‘i bilan bog‘liq sud jarayonlariga taklif etilgan. Shuningdek, byuroning Chinoz tuman bo‘limi mas’ul xodimlari xatti-harakatlari bo‘yicha tekshiruv ishlari boshlangan.
Izoh (0)