Ijtimoiy tarmoqlarda O‘zbekiston fuqarolari Ukrainadagi jangovar harakatlarda ishtirok etishga jalb qilinayotgani haqida xabarlar tarqaldi. Mudofaa vazirligi harbiy xizmatchilarni yollash bo‘yicha tarqalgan xabarlarga munosabat bildirdi.
Qayd etilishicha, O‘zbekiston Konstitutsiyasining 125-moddasiga muvofiq, Qurolli Kuchlar davlat suverenitetini va hududiy yaxlitligini, aholining tinch hayoti va xavfsizligini himoya qilish uchun tuziladi. Mudofaa doktrinasiga ko‘ra, O‘zbekistonning mudofaa sohasidagi siyosati boshqa davlatlarning ichki ishlariga aralashmaslik, ehtimol tutilgan nizolarni tinch yo‘l bilan hal etish tamoyillariga asoslanadi.
Jinoyat kodeksida chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga kirish, yollanish bo‘yicha jinoiy javobgarlik (154-modda — yollanish) moddasi mavjud.
“O‘zbekiston harbiy xizmatchilari mamlakatdan tashqaridagi harbiy harakatlarda ishtirok etmaydi. O‘zbekistonda xorijiy davlatlar tomonidan harbiy xizmatga yollash boshlangani haqida tarqalgan ma’lumotlar hech qanday asosga ega emas”, — deyiladi xabarda.
Izoh (0)