Qashqadaryo viloyatining Qarshi tumanidagi “Kerayt” ma hallasida yashovchi fuqarolar tumanning sobiq hokimi Maqsuda Mustafoyeva ularga yer berganini, yer obod qilingach esa tortib olinib, tadbirkorga hujjatlashtirib berilganini aytmoqda. Bu haqda “Daryo”ga murojaat qilgan aholi vakillari yerni obodonlashtirish uchun katta mablag‘ sarflaganini, umidlari puchga chiqayotganini aytmoqda.
“Namunali uylarda yashaymiz. Kottejimiz oldida qarovsiz yer bor edi. Viloyatning sobiq hokimi Zoir Mirzayev mahallamizga kelganida qarovsiz yerni ko‘rib, yerdan unumli foydalanish kerakligini, obod qilish lozimligini aytgandi. Shundan so‘ng tumanning o‘sha paytdagi hokimi Maqsuda Mustafoyeva biz bilan uchrashib, hamma uyining orqa tomonidagi yerni obod qilsa, yer ularga qonuniy tartibda berilishini aytdi. Biz esa bundan xursand bo‘lib, qarovsiz yerni ekin ekishga tayyorladik. Yerni ag‘darib, foydalanish uchun tayyor holatga keltirdik. Ammo yer tayyor bo‘lganda esa, hokim bog‘dorchilik uchun fermerga berib yuborayotganini bilib qoldik. Mahalladoshlar yig‘ilib, hokimning oldiga bordik. Ammo hokim biz bilan ko‘rishmaslikka harakat qildi”, — deydi Sulton Toshev.
Sulton Toshevning aytishicha, u qarovsiz yotgan yerdan 1 gektar olib, bog‘ yaratgan.
“Oilamiz juda katta. 20 kishi yashaymiz. Mehnat qiluvchilar ko‘p deya bir gektar yer olib, bog‘ yaratgandik. Bugungi kunga kelib esa, yer boshqa fermerga berib yuborilayotganini aytishdi. Bizning mehnatimiz va xarajatlarimiz nima bo‘ladi? Nega hokim opa aytib, aytgan gapidan qaytdi? Buni tartibga olib, adolatli qaror chiqaradigan kishi yo‘qmi”, — deydi Sulton aka.
Shu mahallada yashovchi Iroda Sanayevaning aytishicha, sobiq hokim Maqsuda Mustafoyeva 2021-yilning 2-fevral kuni shu mahallaga kelib, odamlar bilan ko‘rishgan.
“Tuman hokimi viloyat rahbari tanbeh berib ketgach, kelib biz bilan ko‘rishdi. Shu qarovsiz yerlarni obod qilaylik, daraxtlar ekib, chiroyli joyga aylantiraylik, yerni Sizga beramiz, dedi. Biz hokim opa aytgan ishni qildik. Ammo oxirida aldanib qoldik”, — deydi Iroda Sanayeva.
“Daryo” muxbiri bilan suhbatlashgan mahalla ahli hokimga aytgan va’dasini eslatish va yerni qonuniylashtirib olish maqsadida hokim qabuliga 33 marotaba borganini, ammo ishi bitmaganini aytmoqda.
“2021-yil noyabrda tuman hokimligi bizni sudga berdi va yerdan majburiy tartibda chiqarib yuborishlarini aytdi. Biz esa hokimning og‘zaki gapiga ishonib, chuv tushdik”, — deydi mahalla ahli.
Mahallada yashovchi yana bir fuqaro Rajabboy Saidovning aytishicha, ular obod qilib, bog‘ yaratgan yer aslida chiqindixona bo‘lgan.
“Shaxsan o‘zim 1001 ta ko‘chat ekdim. Bog‘ qildim. Bolalarim va o‘zim shu bog‘ uchun qancha mehnat qildik. Endi yerni ekinga tayyorlab, foydalana boshlaganimizda boshqa birov ega chiqmoqda”, — deydi Rajabboy aka.
Shu mahallada yashovchi Karim Rahmatullayev ham hokim opaning gapiga ishonib, ularga berilgan yerda oilaviy mehnat qilganini, ammo endi aldanib qolganini aytmoqda.
“Bizga berilgan yerda 330 tup bodom ekkandik. Endi aynan shu yerimizni boshqa birovga berib yuborishibdi. Tayyoriga ayyor bo‘lganlar esa, ekilgan ko‘chatlarimizga ega chiqishmoqda. Biz bu yer uchun qancha xarajat qilgandik. Hokim opa bilan ko‘rishishga harakat qildik, ammo natija bo‘lmadi. Mana endi u hokim bo‘shab ham ketdi. Bilmadim, endi muammomiz qanday yechim topadi?”, — deydi Karim Rahmatullayev.
Qarshi tumani hokimligi mas’ullari vaziyatga izoh berar ekan, aholi yer berishni va’da qildi deyilgan hokim Maqsuda Mustafoyeva ayni paytda ishdan ketganini, tuman hokimining o‘sha paytda faoliyat yuritgan qishloq xo‘jaligi masalalari bo‘yicha o‘rinbosari Akrom Aripov ham ayni kunda Muborak tumanida faoliyat yuritayotganini bildirib, amalda bo‘lib turgan mas’ullar vaziyatdan bexabarligini ma’lum qildi.
Hokimlik mas’ullarining qo‘shimcha qilishicha, aholi mevali daraxtlar ekib, obod qilganmiz deyilayotgan 5 gektar yer 2021-yil 9-fevral kuni tuman hokimi qarori bilan A.Safarovga bog‘dorchilik qilish uchun berilgan.
Aholi ayni kunda mazkur masala yuzasidan sud ishi ham boshlanganini, achinarlisi ularga yer berilishi lozimligini aytib, hududni obodonlashtirish lozimligi haqida topshiriq bergan viloyatning sobiq hokimi Zoir Mirzayev ham, ularga yer berilishini va’da qilgan hokim Maqsuda Mustafoyeva ham, mazkur ishga mas’ullik zimmasiga yuklatilgan Akrom Aripov ham ayni kunda bu tumanda yo‘q. Ishdan ketgan. Aholi esa ularning og‘zaki va’dasiga ishonib, bugun afsusda qolgan.
Izoh (0)