Polshaning Katovitse shahridan Toshkentga 251 nafar O‘zbekiston fuqarosi bo‘lgan oltinchi samolyot yo‘l oldi

2-mart kuni mahalliy vaqt bilan soat 10:50 da (Toshkent vaqti bilan 14:50) Polshaning Katovitse shahri aeroportidan Uzbekistan Airways aviakompaniyasining O‘zbekiston fuqarolari bo‘lgan oltinchi maxsus reysi uchdi, deb xabar bermoqda “Dunyo” axborot agentligi.

Samolyot bortida 251 kishi, jumladan, ayollar, bolalar, talabalar, Ukrainada vaqtincha ishlagan va tahsil olgan fuqarolar bor.

2-mart kuni yana ikkita maxsus samolyot Toshkentdan Katovitse shahriga yetib keladi, u yerda yana bir guruh O‘zbekiston fuqarolari Ukraina–Polsha chegarasidan avtobuslar orqali yetkazilgan.

Shu kuni mahalliy vaqt bilan soat 11:00 da (Toshkentda 15:00) “Karchova” nazorat-o‘tkazish punktiga 600 ga yaqin O‘zbekiston fuqarosi to‘planib, uyiga uchib ketish istagida bo‘lgan.

Shu bilan birga, “Karchova” nazorat-o‘tkazish punkti rahbariyati muhojirlar ko‘pligi sababli yig‘ish punktini bosqichma-bosqich bo‘shatishni so‘ramoqda. Shu munosabat bilan O‘zbekiston fuqarolari navbatdagi reysga o‘z vaqtida chiqishlari uchun aeroportdan Katovitse aeroportiga muntazam ravishda olib kelinadi.

Lvov shahridan olingan ma’lumotlarga ko‘ra, Ukrainaning “Krakovets” nazorat-o‘tkazish punktida yana bir necha yuz O‘zbekiston fuqarolari Polshaning “Karchova” nazorat-o‘tkazish punkti tomon chegarani kesib o‘tish uchun kutishmoqda. Lvov shahrida ham fuqarolarni jamlash punkti mavjud.

Qayd etilishicha, O‘zbekistonning Polsha va Ukrainadagi elchixonasi xodimlari yuzaga kelgan muammolarni hal qilish bilan shug‘ullanmoqda. Elchixonalarda shtab-kvartiralar kecha-yu kunduz ishlamoqda. O‘zbekiston fuqarolari uchun issiq ovqat yetkazilib, zarur hollarda tibbiy xizmatlar ko‘rsatilmoqda.

Aloqa uchun:

O‘zbekistonning Ukrainadagi elchixonasi: +380 44 501 50 00, +380 44 501 41 81, +380 44 501 41 82, +380 44 501 41 83

O‘zbekistonning Polshadagi elchixonasi:

Ma’ruf Karimov (“Karchova” nazorat-o‘tish punktida): +48 508 064 333; Telegram: +99893 5947557

Asqar Beknazarov (Katovitse shahri aeroportida): +48 508 995 888; Telegram: + 99890 1160084

Sardor Axmatov (elchixonada): +48 502 501 588; Telegram: + 99894 6541010

O‘zbekiston TIV Call-markazi: 1164

Bundan avval Ukrainadan evakuatsiya qilingan O‘zbekiston fuqarolarining soni 1 186 nafarga yetgani haqida xabar berilgandi.