Ташқи ишлар вазирлиги Украинадаги вазият туфайли Ўзбекистон элчихонасини бошқа шаҳарга кўчириш масаласи режалаштирилмаётганини маълум қилди.
Қайд этилишича, фуқаролардан «Киевда элчихоналари бўлган кўплаб давлатлар ўз идораларини Львов шаҳрига кўчирди. Ўзбекистон ҳам шундай йўл тутишни режалаштирганми?», қабилида савол келиб тушган. Бунга Ташқи ишлар вазирлиги расмий вакили қуйидагича жавоб берган:
Айни пайтда бизнинг асосий устувор вазифамиз Украинадаги мавжуд оғир вазиятни инобатга олган ҳолда барча Ўзбекистон фуқароларини хавфсиз эвакуация қилишни таъминлашдир. Элчихонанинг бошқа ҳудудга кўчирилиши бу жараёнлар самарадорлигини сезиларли даражада пасайтиради. Шу нуқтаи назардан ҳозирда элчихонамизни Киевдан кўчириш масаласи кўриб чиқилмаяпти.Эслатиб ўтамиз, Ўзбекистоннинг Украинадаги элчиси Алишер Курманов 28 февраль куни «Дарё» интернет-нашрига Украинадаги вазият ва ўзбекистонликларни эвакуация қилиш борасида катта интервью берганди. Унда элчи фуқароларнинг эвакуацияси якунлангач, кун тартибида элчихона ходимларини ҳам эвакуация қилиш масаласи бор ёки йўқлиги ҳақидаги саволга ҳам жавоб берган:
«Айни дамда буни режа қилмаганмиз. Вазифаларимиз бор шунинг учун бундай режаларимиз йўқ, албатта. Бу элчихона учун муҳим масала эмас. Биз каби қардош давлат элчихоналари ҳам ўз фаолиятини давом эттиряпти. Элчихоналар билан вазият бўйича фикр алмашяпмиз. Кўп давлатлар ўз талабаларини ва фуқароларини олиб кетолмаяпти.
Львов энг ғарбий шаҳар. Баъзи давлат элчихоналари энг хавфсиз жой деб у ерга кўчиб ўтди. Лекин барибир у ерда ҳам сиреналар чалиняпти. Афсуски, Украинанинг ғарбига яқин шаҳарларда ҳам жанглар бўляпти».
Изоҳ (0)