Arab davlatlari Ukrainadagi vaziyat bo‘yicha betarafligini e’lon qildi

Arab davlatlari Ukraina atrofidagi vaziyat bo‘yicha betaraflikni e’lon qildi. Bu haqda Misr davlat axborot xizmati saytida ma’lum qilingan.

Arab davlatlari ligasi bosh kotibining yordamchisi Husam Zakiyning ma’lum qilishicha, yig‘ilishda arablarning Ukrainadagi mavjud vaziyatga qarashlarini ifoda etuvchi qo‘shma bayonot qabul qilingan.

“Arab davlatlari Ukraina bilan ham, Rossiya bilan ham do‘stona munosabatda. Do‘stlarga esa ularning bir-biri bilan urushayotganini kuzatish og‘ir va shu sabab LAS betaraflik pozitsiyasini egalladi”, — deydi Zakiy.

LAS shtab-kvartirasida o‘tkazilgan uchrashuvda ishtirokchilar Ukrainadagi gumanitar vaziyat yomonlashganidan xavotirda ekanini bildirib, mojaroni diplomatik yo‘l bilan hal etishga ko‘maklashish uchun vazirlar darajasida maxsus aloqa guruhini tuzishga tayyorliklarini ma’lum qilgan. Arab davlatlari ligasi barcha manfaatdor tomonlarni Ukrainadagi mavjud vaziyatni “dunyoning eng muhim mintaqalaridan birida yashovchi xalqlar xavfsizligini ta’minlaydigan tarzda” muloqot va diplomatiya yo‘li bilan hal qilishga chaqirgan.

Arab davlatlari ligasiga 18 ta davlat, jumladan, Saudiya Arabistoni, BAA, Qatar va Kuvayt kiradi.

Avvalroq Xitoy Ukraina suverenitetini himoya qilishi va Rossiyaning xavfsizlik bo‘yicha pozitsiyasini inobatga olishga chaqirgani, Osiyo davlatlari Rossiyaga qarshi sanksiyalar qo‘llashni boshlagani, Avstraliya Putin, Shoygu va Lavrovning mamlakatga kirishini taqiqlagani to‘g‘risida xabar berilgandi.