Араб давлатлари Украинадаги вазият бўйича бетарафлигини эълон қилди

Араб давлатлари Украина атрофидаги вазият бўйича бетарафликни эълон қилди. Бу ҳақда Миср давлат ахборот хизмати сайтида маълум қилинган.

Араб давлатлари лигаси кенгаши (LAS) Кувайт яқинидаги штаб-квартирасида доимий вакиллар даражасида фавқулодда йиғилиш ўтказиб, Украинадаги сўнгги воқеаларни муҳокама қилди. Йиғилиш Миср ташаббуси билан ўтказилган бўлиб, уни Кувайт, Иордания ва бошқа қатор араб давлатлари қўллаб-қувватлаган.

Араб давлатлари лигаси бош котибининг ёрдамчиси Ҳусам Закийнинг маълум қилишича, йиғилишда арабларнинг Украинадаги мавжуд вазиятга қарашларини ифода этувчи қўшма баёнот қабул қилинган.

«Араб давлатлари Украина билан ҳам, Россия билан ҳам дўстона муносабатда. Дўстларга эса уларнинг бир-бири билан урушаётганини кузатиш оғир ва шу сабаб LAS бетарафлик позициясини эгаллади», — дейди Закий.

LAS штаб-квартирасида ўтказилган учрашувда иштирокчилар Украинадаги гуманитар вазият ёмонлашганидан хавотирда эканини билдириб, можарони дипломатик йўл билан ҳал этишга кўмаклашиш учун вазирлар даражасида махсус алоқа гуруҳини тузишга тайёрликларини маълум қилган. Араб давлатлари лигаси барча манфаатдор томонларни Украинадаги мавжуд вазиятни «дунёнинг энг муҳим минтақаларидан бирида яшовчи халқлар хавфсизлигини таъминлайдиган тарзда» мулоқот ва дипломатия йўли билан ҳал қилишга чақирган.

Араб давлатлари лигасига 18 та давлат, жумладан, Саудия Арабистони, БАА, Қатар ва Кувайт киради.

Аввалроқ Хитой Украина суверенитетини ҳимоя қилиши ва Россиянинг хавфсизлик бўйича позициясини инобатга олишга чақиргани, Осиё давлатлари Россияга қарши санкциялар қўллашни бошлагани, Австралия Путин, Шойгу ва Лавровнинг мамлакатга киришини тақиқлагани тўғрисида хабар берилганди.