Ukraina ichki ishlar vazirining maslahatchisi Anton Gerashenko Odessa va Sumsk viloyatlarida, shuningdek, Mariupol shahridagi otishmalar oqibatida halok bo‘lganlar to‘g‘risida ma’lumot berdi.
Uning so‘zlariga ko‘ra, Sumsk viloyatining Konotop tumanida avtomobil o‘qqa tutilishi oqibatida bir ayol farzandi bilan jabrlangan. Odessa viloyatining Podolsk harbiy qismida olti kishi halok bo‘lgan, yetti kishi jarohat olgan, 19 kishi bedarak yo‘qolgan.
Mariupolda sodir bo‘lgan otishma bir kishining umriga zomin bo‘lgan, yana ikki fuqaro jarohat olgan. Nikolayev viloyatidagi harbiy aerodromning o‘qqa tutilishi oqibatida bir kishi jarohat olgan, Xerson viloyatida esa 17 yoshli o‘smir halok bo‘lgani aytilmoqda.
“Interfaks—Ukraina” mamlakat IIV ma’lumotlariga tayanib, Xerson viloyatining “Preobrajenka” aholi punktida bir nafar chegarachi halok bo‘lganini ma’lum qildi.
24-fevralga o‘tar kechasi Rossiya prezidenti Vladimir Putin Donbassda “mintaqa aholisini genotsiddan himoya qilish” uchun “maxsus harbiy operatsiya” boshlanganini ma’lum qildi. Rossiyaliklarga murojaatida u Kreml Ukrainani demilitarizatsiya va denasifikatsiya qilishga intilishi, biroq Ukraina hududlarini bosib olish rejada yo‘qligini aytdi.
Putinning murojaatidan so‘ng ijtimoiy tarmoqlarda Ukrainaning ko‘plab shaharlarida portlashlar sodir bo‘lgani haqida xabarlar paydo bo‘ldi. Ukraina Ichki ishlar vazirligi rahbari maslahatchisi Anton Gerashchenko 24-fevral kuni erta tongda Kiyev, Xarkov va Dneprda harbiy infratuzilma obyektlariga raketa zarbalari berilganini ma’lum qildi. Rossiya Mudofaa vazirligi esa “Ukraina harbiy infratuzilmasi ishdan chiqarilayotganini”, mamlakatning tinch aholisiga hech qanday tahdid yo‘qligini e’lon qilgan.
Izoh (0)