Rossiya Mudofaa vazirligi Ukraina shaharlariga hech qanday raketa, aviatsiya yoki artilleriya zarbalarini amalga oshirmagan. Bu haqda idora bayonotiga tayanib, “RIA Novosti” xabar berdi.
Rossiyalik harbiylarning ta’kidlashicha, ayni vaqtda yuqori aniqlikdagi qurollar yordamida Ukraina armiyasining harbiy infratuzilmasi, havo hujumidan mudofaa qilish obyektlari, harbiy aerodrom va aviatsiyalari ishdan chiqarilmoqda.
Idoraning qo‘shimcha qilishicha, Ukraina aholisiga hech qanday xavf yo‘q va ular tahdidlardan holi.
24-fevralga o‘tar kechasi Rossiya prezidenti Vladimir Putin Donbassda “mintaqa aholisini genotsiddan himoya qilish” uchun maxsus harbiy operatsiya boshlanganini ma’lum qildi. Rossiyaliklarga murojaatida u Kreml Ukrainani demilitarizatsiya va denazolifikatsiya qilishga intilishi, biroq Ukraina hududlarini bosib olish rejada yo‘qligini aytdi.
Putinning murojaatidan so‘ng ijtimoiy tarmoqlarda Ukrainaning ko‘plab shaharlarida portlashlar sodir bo‘lgani haqida xabarlar paydo bo‘ldi. Ukraina Ichki ishlar vazirligi rahbari maslahatchisi Anton Gerashchenko 24-fevral kuni erta tongda Kiyev, Xarkov va Dneprda harbiy infratuzilma obyektlariga raketa zarbalari berilganini ma’lum qildi.
Izoh (0)