Украина ички ишлар вазирининг маслаҳатчиси Антон Герашенко Одесса ва Сумск вилоятларида, шунингдек, Мариупол шаҳридаги отишмалар оқибатида ҳалок бўлганлар тўғрисида маълумот берди.
Унинг сўзларига кўра, Сумск вилоятининг Конотоп туманида автомобиль ўққа тутилиши оқибатида бир аёл фарзанди билан жабрланган. Одесса вилоятининг Подолск ҳарбий қисмида олти киши ҳалок бўлган, етти киши жароҳат олган, 19 киши бедарак йўқолган.
Мариуполда содир бўлган отишма бир кишининг умрига зомин бўлган, яна икки фуқаро жароҳат олган. Николаев вилоятидаги ҳарбий аэродромнинг ўққа тутилиши оқибатида бир киши жароҳат олган, Херсон вилоятида эса 17 ёшли ўсмир ҳалок бўлгани айтилмоқда.
«Интерфакс—Украина» мамлакат ИИВ маълумотларига таяниб, Херсон вилоятининг «Преображенка» аҳоли пунктида бир нафар чегарачи ҳалок бўлганини маълум қилди.
24 февралга ўтар кечаси Россия президенти Владимир Путин Донбассда «минтақа аҳолисини геноциддан ҳимоя қилиш» учун «махсус ҳарбий операция» бошланганини маълум қилди. Россияликларга мурожаатида у Кремль Украинани демилитаризация ва денасификация қилишга интилиши, бироқ Украина ҳудудларини босиб олиш режада йўқлигини айтди.
Путиннинг мурожаатидан сўнг ижтимоий тармоқларда Украинанинг кўплаб шаҳарларида портлашлар содир бўлгани ҳақида хабарлар пайдо бўлди. Украина Ички ишлар вазирлиги раҳбари маслаҳатчиси Антон Герашченко 24 февраль куни эрта тонгда Киев, Харков ва Днепрда ҳарбий инфратузилма объектларига ракета зарбалари берилганини маълум қилди. Россия Мудофаа вазирлиги эса «Украина ҳарбий инфратузилмаси ишдан чиқарилаётганини», мамлакатнинг тинч аҳолисига ҳеч қандай таҳдид йўқлигини эълон қилган.
Изоҳ (0)