Angliya Premyer Ligasida oxirgi o‘rinni egallagan jamoa 2022/23-yilgi mavsumda 106 million funt sterling mukofot puliga ega bo‘ladi, deb xabar beradi The Telegraph.
Liganing televideniye huquqlarini xorijda sotish bo‘yicha yangi kelishuvi tufayli oxirgi o‘rindagi jamoaga to‘lov 2021/22-yilgi mavsumga nisbatan 8 million funtga oshadi.
2022/23-yilgi mavsum chempioni esa 176 million funt sterling mukofot puli oladi.
Mamlakat tashqarisidagi televizion daromadlarni taqsimlashning yangi formulasiga ko‘ra, qo‘shimcha mablag‘larning yarmi klublar o‘rtasida teng taqsimlanadi, jamoalarga to‘lanadigan bazaviy to‘lovlar ham 48 million funtdan 56 million funtga ko‘tariladi. Qolgan qismi esa jamoalarning natijalariga bog‘liq. Shu tariqa chempion bu mavsumdagi 153 million funt o‘rniga qo‘shimcha 11 million funt bilan jami 176 million funt sterlingga ega bo‘ladi.
Eslatib o‘tamiz, musobaqaning amaldagi g‘olibi “Manchester Siti” joriy mavsumda ham 24 ta o‘yin o‘tkazib, 60 ochko bilan musobaqa jadvalida peshqadamlik qilmoqda. “Shaharliklar” bitta kam o‘yin o‘tkazgan “Liverpul”ni 9 ochkoga ortda qoldirmoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)