Neymarning hisob raqamidan pul o‘g‘irlandi. Jinoyatchi qo‘lga olingan

San-Paulu (Braziliya) shtati politsiyasi “PSJ” hujumchisi Neymarning bank hisob raqamidan pul o‘g‘irlagan shaxsni qo‘lga oldi.

Marca nashrining yozishicha, 20 yoshli talonchi futbolchidan, taxminan, 220 ming real (deyarli 37 ming yevro) o‘g‘irlagan.

Ayblanuvchi mahalliy kompaniyalardan birida ma’muriy yordamchi bo‘lib ishlagan. Uning noqonuniy operatsiyalar orqali firibgarlik bilan shug‘ullanadigan jinoiy guruh tarkibida bo‘lgani aytilmoqda.

Shuningdek, rasmiylar firibgarlikka aloqador boshqa shaxslarni ham aniqlaganini ma’lum qilgan.

Eslatib o‘tamiz, Neymar noyabr oyining oxiridan beri to‘pig‘idagi jarohati sabab maydonga tushmayapti. U 10-fevral kuni umumiy mashg‘ulotlarga qo‘shilgan. Shunga qaramay, uning Chempionlar Ligasi 1/8 finali doirasida 15-fevral kuni bo‘lib o‘tadigan “Real”ga qarshi o‘yinni o‘tkazib yuborishi mumkinligi haqida xabarlar yangramoqda.

Braziliyalik hujumchi Fransiya chempionatining 10 o‘yinida 3 tadan gol va golli uzatmaga mualliflik qildi.